September 18, 2014
Kia tika te huarahi
Kia tika te huarahi
Kua tiimata te rerenga o te puehu toorangapuu i te Taitokerau.
Inanahi i korero mai te Piriimia a John Key i tana hiahia me pooti nga Maori e tautoko ana i a Naahinara mo Kelvin Davis o Reipa mehemea koia te piirangi.
Hai taa Hone Harawira ko tera rautaki tetahi waahanga o te mahi ki te whakararu i a Mana me tana kii kei te tautoko te Paati Maori i taua huarahi.
Ngaamotu tuuru Maori
E tuu ana te roopu o Grey Power i Ngaamotu ki te mautohe i te whakaritenga o tetahi tuuru Maori ki to ratou kaunihera.
E mea ana ratou he tikanga whakawehewehe i te haapori koia taa ratou tirohanga ki nga tuuru Maori. Hai taa Andrew Judd te koromatua o Ngaamotu me paatai te hunga whakahee ki a ratou ano, he aha ratou i mataku ai? I te mutunga ake ko te hiahia kia whai reo te Maori.
Taupatupatu whakamutunga
He tautohe e paa ana ki nga tatauranga o te waa.
Koia te ahua o te taupatupatu whakamutunga i te poo raa i waenganui i a David Cuniliffe raaua ko John Key.
Toru tekau meeneti noa iho te roa o te korero aa i whakaaetia e te tokorua he huarahi uaua ake te ara pooti i tenei tau.
Ki taa raaua ano kiihai i taea te korero i nga kaupapa nui o te waa na te whakatiitaha atu ki etahi kaupapa tautohenga e tirohia nei kua haukotingia te titiro hoohonu ki kaupapa whakahirahira ake.
Tuuranga mahi te mea nui
E whakaae ana nga kaiwhakataetae Maori katoa ki nga rohe pooti Maori ko te mea nui kia waihanga i nga tuuranga mahi hou.
Hei taa Paula Bennett o Naahinara e maaia ana tana roopu ma te kaha haere o nga kaupapa oohanga a nga tau e tuu mai nei ka kite i te hanganga o nga tuuranga mahi e hia kee mano.
Hai taana ano ki te kore he tuuranga i tetahi rohe ka aawhina i nga whaanau ki te haere ki waahi kee kia whiwhi mahi ai ratou.
Tokoiti nga rangatira waahine.
Tera tonu pea ka tuu ko Meetiiria Tuurei anake te wahine rangatira ki paaremata a muri atu i te koowhiringa pooti.
Ko Laila Harre rangatira takirua o Ipurangi Mana ko ia ano tetahi mehemea ka whai i a Hone Harawira ki reira.
Hai taa Tuurei kua rerekee te taiao toorangapuu no te waa i a Helen Clark raaua ko Jenny Shipley nga piriimia o mua.
Hai taa Tuurei ano koia tana pouritanga ki te tokoiti o nga waahine e whai waahi ai ki nga tuuranga teitei.
Ka hoki pea nga kaipooti Maori.
E whakapae a Winston Peters rangatira o Aotearoa Tuatahi ka riro ma tana roopu etahi pooti Maori kiihai ratou i whiwhi i nga koowhiringa pooti o mua.
Hai taa Peters kei te rongohia te huringa o te tai me te hokinga o nga kaipooti o mua ki a ia.
Te mea kee hai taa Peters ano e whakapau kaha ana a Aotearoa ki te whakataetae atu ki nga roopu katoa aa e whakaae ana te Maori ki tera ahua.
Copyright © 2014, UMA Broadcasting Ltd: www.waateanews.com