January 24, 2018
Wero a Rāhui Papa i a Bill English
Wero a Rāhui Papa i a Bill English
Heoi, i wero a Rāhui Papa i te kaiārahi i a Nahinara i a Bill English i Rātana inanahi e pā ana ki āna kōrero mō te reo Māori. Mai rā anō i te tau rua mano mā tahi kua haere a English ki Rātana, ā, hei tā Rāhui Papa, māngai mo te Kingitanga ki runga i te marae o Rātana, i hē te kōrero a English i kī ake rā ia, ehara i te katoa o ngā uri o tēnei whenua te reo Māori, engari, nō te iwi Māori anake. Hei tā Papa, kei roto i ngā iaia o tēnei whenua te reo Māori e pakiaka ana, nō reira, mena kei konei koe e noho ana, nou te reo.
Whakatau i ngā raru o tēnei whenua
Hei tā te Peremia a Jacinda Ardern ki te pā o Rātana inanahi, kei te iwi Māori ētahi tikanga hei ārahi i te Kāwanatanga ki te whakatau i ngā raru o tēnei whenua. Hei tāna, he nui ngā kaupapa e hiahia ana te Kāwanatanga hou ki te rongoā ake, ēngari, me whai āwhina, me whai tautoko i te iwi Māori. Hei tāna, ko te whakamahana i ngā whare me te turaki i te tuakokatanga tamariki ētahi o aua kaupapa nui.
Te whakamaumaharatanga Pakanga hou ki NSW
Kua tae te tono i te Kāwanatanga o NSW i Ahitereiria, ki ngā iwi o Tauranga Moana me Waikato Tainui kia kohaina e rātou he oneone nō Pukehinahina, Te Ranga me Rangiriri ki te Whakamaumaharatanga Pakanga hou ki roto o NSW. Hei tā Buddy Mikaere o Ngāti Pukenga, whā rau tāngata nō Ahitereria i haere mai ki Aotearoa ki te pakanga ki ngā iwi o Tauranga i Pukehinahina.
Copyright © 2018, UMA Broadcasting Ltd: www.waateanews.com