August 30, 2018
Te Maina Onepū ki Taranaki
Te Maina Onepu ki Taranaki
Hei tā tētahi o ngā iwi o Taranaki, ka mahue tā te Kōti Taiao aukati i te hiahia o Trans Tasman Resources ki te maina i ngā onepū rino i te papa moana i Taranaki, i mua noa atu i te taenga atu o te take nei ki te kōti teitei. Hei tā Debbie Ngarewa Packer o Ngāti Ruanui, e harikoa ana ia i whakaae te kaiwhakawā o te kōti teitei ki tā rātou tono aukati i taua mahi.
Ngā Whakataetae Kupu Ora a te Whare Wānanga o Te Kunenga ki Pūrehuroa
Kei te whakatenatenahia ngā kaituhi pukapuka Māori kia whakatairanga rātou i a rātou pukapuka i tuhia e rātou i te tau nei, ki te whakataetae Ngā Kupu Ora a te Whare Wananga o Te Kunenga ki Pūrehuroa. Hei tērā wiki ka kati te wā tāpae pukapuka ki taua whakataetae, a, hei tā te kaiwhakahaere a Raewyn Rasch, he whakataetae tēnei hei whakanui i te kounga o ngā pukapuka Māori, hei whakakaurera hoki i ngā whakaaro o te Māori ki ngā take o te wā.
Te Whakatīwhetatanga Wāhine
Kei te whakahaere hui ngā rōpu kiriata, hōtaka pouaka whakaata hoki a tērā wiki kia āta wānanga rātou i te whakatīwhetatanga wāhine i roto i to rātou rāngai. Hei tā Erina Tamepo o Ngā Aho Whakaari, ko te take i whakatūria ai tēnei hui, he hiahia nō rātou ki te hāpai i te wero a te rōpu Screen Women's Action Group, ara, a te rōpu SWAG, kia whakamanatia e te rāngai he tūtohinga hei tāwharau i ngā wāhine i te whakatīwhetatanga. E korikori ana te rāngai ki te tāwharau i ngā wāhine i tēnei wā whai muri iho i ngā whakapae whakatīwheta i ūtaina rā ki runga i te ringa tohu kiriata rongonui i a Harvey Weinstein me te putanga mai o te kaupapa Me Too.
Te Tahua Whakangao Māori
E ai ki te toihau o te Tahua Whakangao Māori hou a Paul Majurey, ko te wawata kia toitū te whai rawatanga i waenganui i ngā iwi me ngā rōpu e whai wāhi ana ki taua tahua. Kotahi rau, tekau mā rima miriona tāra kei roto i te tahua nei, a, e rua tekau mā ono ngā iwi, ngā hapu me ngā tarahiti whenua e noho ana ki taua tahua. Hei tā Majurey, ka kimihia he kaupapa hei tautoko mā te tahua ki te pūtea, i runga i te wawata kia puta he hua nui i aua whakapaunga pūtea ki ngā rōpu whai pānga o te Tahua.
Copyright © 2018, UMA Broadcasting Ltd: www.waateanews.com