July 24, 2019
Ināia Tonu Nei – The Time is Now: Ripoata mō ngā tirohanga Māori mō te manatika kua whakaputa i te rā nei.
Ināia Tonu Nei – The Time is Now: Ripoata mō ngā tirohanga Māori mō te manatika kua whakaputa i te rā nei.
Kei konei te ripoata whakamutunga.
Kua mārakerake te kite i te karanga kia pono ai te arahi a te iwi Māori i te hanga o te punaha manatika mō te āpōpō ki Aotearoa, i tetahi ripoata kua whakaputa i te rā nei.
Ko te ripoata, Ināia Tonu Nei – The Time is Now: We Lead, You Follow, e kapo ana i ngā kōrero i te hui ā-motu Māori i tū ki Rotorua i te Paengawhāwhā 2019 ki te wānanga i ngā wheako Māori i te pūnaha manatika.
E ai ki ngā māngai mō te ripoata, ki a Tā Mark Solomon rāua ko Katie Murray, e whakaata ana te ripoata i ngā āhuatanga e rua – ko te ao kikokiko taimaha mō te iwi Māori i te ringa kaha o te pūnaha manatika koroniara. Ka rua, ko te ngao nui a te iwi Māori ki te arahi i te whakairo hou i te punaha manatika.
“Reanga atu reanga mai kua pēhia pāhikahika nei te iwi Māori e te punaha manatika kua uruhi ki tō tātou iwi,” e ai ki te māngai kōrero tuatahi, Katie Murray.
“Mārama kehokeho ana te kite ahakoa te ine ka whakamahia, e mamae nui ake ana te iwi Māori i te punaha manatika, tēnā i tetahi atu rōpu tāngata i Aotearoa. Kei te pari o te rua tēnei mō Aotearoa, kua tohua i ngā nama nui rawa atu o te hunga Māori e mau ana i te ngongo manatika tēnā i tetahi atu wā i te hitori o Aotearoa.
“Ariari ana te rongo i te Hui Māori me pīkau te Karauna i te haepapa mō te whakarerenga o te tāmitanga me te pēhi ā-reanga nei e whai pānga tonu ana ki ngā whānau i ēnei rā. Ko ngā wheako o ngā oranga o te iwi Māori i te Pūnaha Manatika he kaikiri, he ngākaukino.
“Hei tā mātou, ko te tangata e whakapono ana kāore he ngākaukino i te punaha manatika, ko ia kāore i te tino mārama i ngā aituā ka pā ki a Ngāi Māori i ia rā i te Pūnaha Manatika. Me te aha tēnei te wero ki a rātou ki te tūhono mākohakoha mai ki a mātou, ā ngākau nui nei,” tā māngai tahi i kī Katie Murray.
“Ahakoa te mamae ā reanga whakapapa nei e rongohia ana e te iwi Māori, i te Hui Māori he nui te hiahia o te iwi Māori me te Karauna kia tūhono rena tūturu nei kia whakairohia he punaha manatika hou mō Aotearoa,” te kī a te māngai tuarua, Tā Mark Solomon.
“E kore e tāea te whakahou i te Pūnaha Manatika me te kore whai wāhi a ngā kaiarahi i te ao Māori. I karanga te Hui Māori ki te Karauna kia ea rawa te toha i te mana ki te iwi Māori, ā, kia waenga pū ngā urupare Māori ki te whakahoutanga o te Pūnaha Manatika,” te kōrero a te māngai tuarua, Tā Mark Solomon.
“Kei te iwi Māori te mātauranga, ngā hononga tāngata, ngā wheako, me te āheinga ki te arahi i te whakahou i te pūnaha manatika. E karanga ana mātou ki te Karauna kia tūhono ki te iwi Māori, kia tāpiri ki ngā mahi kua kōkirihia kētia e huataki manawa ora ana, e whai hua kē hoki ana ki ō tātou hapori, ā, kia whakairohia he punaha e tika ana mō te Aotearoa onāianei.
“Ka tāea, ā, me mau ngātahi i a tātou tēnei āheinga ki te hanga i tetahi pūnaha manatika haumaru ake, he kounga ake hoki mō Aotearoa whānui. Ināia tonu nei, the time is now,” ta te māngai tuarua, Tā Mark Solomon.
KUA OTI
Copyright © 2019, UMA Broadcasting Ltd: www.waateanews.com