January 19, 2024
Ka pororuatia te kāhui maunga o Taranaki e ngā pūrere kapo hau !
Ka pororuatia te kāhui maunga o Taranaki e ngā pūrere kapo hau, ā, kāore te hau kainga i te tautoko.
Koia tētahi o ngā māharahara nui a ngā hapū o Te Korowai o Ngāruahine ki te whakaaetanga o te kōkirihanga i ngā mahi whakatū pūrere kapo hau ki Taranaki ki te Tonga.
Hai tā te Heamana o te hapū o Ōkahu-Inuāwai hai tā John Hooker kāore ngā kamupene hiko a Hiringa Energy rātou ko Ballance Agri-Nutrients i whai whakaaetanga i ngā hapū.
Nā konā i whakatau ai ngā hapū o Ngāruahine ki te kawe i ō rātou nawe ki te United Nations, ā, ki reira ka whakamiramirahia ngā tukanga whakahaere a ngā kamupene hiko e aukati ana i te reo o te haukāinga, e takahi hoki ana i ngā mātāpono o Te Tiriti o Waitangi, ka mutu, te kore i whai whakaaro ki ngā wāhi tapu e tū nei hai tūtohu whenua whakahirahira ki ngā hapū o Ngāruahine.