November 08, 2023
Willie Jackson: Ka whawhai tonu te Māori mō āna mōtika
E mea ana te kaitōrangapū a Willie Jackson ka noho tonu ia ki te Pāremata hei wero i ngā hiahia o te pāti ACT ki te whakatūhia e rātou he pakirehua ā-motu hei arohaehae i Te Tiriti o Waitangi.
Koinā te kī a Jackson whai muri i te huinga a ngā kāhui minita o Reipa i Te Awakairangi i Te Whanganui-a-Tara inānahi.
I puta ēnei kōrero i a Jackson nā runga i te hiahia a te kaiārahi o ACT a David Seymour ki te āta aromātaitia e te motu mehemea āe, kāo rānei he mana tō ngā mātāpono o Te Tiriti i te motu nei.
Hei tā Jackson tonu, ahakoa kua whakamātauhia kētia e te ture ngā mātāpono o Te Tiriti, kei te hiahia tonu a Seymour ki te takahi i te mana o te ture kua whakamātau kētia e ngā kaiwhakawā o te kōti teitei, o te Taraipunara o Waitangi anō hoki.
E mea hoki ana a Jackson ki te tutuki te hiahia kia whakahaere pakirehua ā-motu ka pakanga te Māori mō te take nei, ā, ka tautoko mārika ia i tēnā tohe, i tēnā pakanga.