October 31, 2023
M9: Ko te ao whakaari te kaupapa
Ā te marama e haere ake nei tū ai te terenga whakamutunga o te tau ki te whakaaturanga o M9, e whakarauika ai ngā kaikōrero tokoiwa Māori ki te kōrero i ō rātou wheako ki ō rātou wāhi ahumahi, ā, ko te kaupapa e kōrerotia ana ko te kaha o te mahi a ngā kaiwhakaari Māori i ēnei rā.
Hei tā tētahi o ngā kaikōrero ki tēnei terenga o te kaupapa, hei tā Te Kohe Tuhaka, he hirahira ki a ia te kite i te whanaketanga o ngā kaiwhakaari Māori o te motu.
Hei tāna, i ngā tau 90, i te wā i uru ia ki te ao whakaari hei rangatahi, he ruarua noa iho ngā kanohi Māori i taua ao, ā, kāore i te mārama te ara ki te mahi whakaari.
“I roto i aua wā rā, kāore i tino kitea nuitia te Māori i runga i te pouaka whakaata e mahi whakaari ana. Otirā, kāore au i te tino mōhio ki tētehi hunga Māori nei e mahi ana i tēnei tūmomo mahi. Nō reira, i nui ngā āmaimai, me kī, heoi i roto i tētehi paku whitinga ahi ki roto i a au, i whāngai au i tētahi kaiako i te kura tuarua ki ngā kōrero ki ngā pūrākau, ā, ka tīmata au i reira.”
Hei te 19 o Noema tū ai te whakaaturanga M9 i Tāmaki Makaurau, ko ‘He Mataaho ki Te Ao Whakaari’ te taitara.