August 29, 2023
He pānara tōrangapū mō te reo ki Waitangi
Ko ngā kaupapa here reo Māori a ngā pāti tōrangapū te kaupapa matua o tētehi pānara reo Māori ka tū ki te Whare Rūnanga ki Waitangi ā te Hātarei, arā te 2 o Hepetema.
Ko te koromatua o Te Kaunihera o Tai Tokerau ki te Raki a Moko Tepania te kaitakawaenga. Hei tāna, ka whakakotahi te hui nei i ngā kaupapa e rua o te wā, ko te Mahuru Māori me te Kōwhiringa Pōti. Ki tōna mōhio, i tēnei wā ka whai wāhi atu ngā arero Māori o Reipa, o Nāhinara, o Ngā Kākāriki me Aotearoa Tuatahi.
E ai ki a Tepania: “He rautaki reo Māori tā te kāwanatanga, he mea ka hāngai atu ka pēhea anō tātou e whakarauora i tō tātou reo. Nō reira, ka hanga, tupu atu i ērā momo pātai: Mēnā ka tū ai tō pāti hei kāwanatanga i tēnei tau nei, ka pēhea tonu koe e whakaū, e whakamana ai i ērā momo kī taurangi e noho ana ki roto i te Maihi Karauna i raro i te maru o Te Mātāwai, kia kōkiri tonu ai ērā kaupapa. He kai mā te hingaro.”
He kore-utu te hui, ko Te Kupenga Reo te ingoa, ā, ka tuwhera ngā tatau ā te 5 karaka. Ka pāpāhotia mataoratia te hui nei.