June 19, 2023
Ko Te Pakakohi te iwi, ko Ngawaka Taurua te tangata
Kei te hūro ngā iwi o te tonga o Taranaki i te kitenga o tētahi waka tawhito i ngā tahataha o tō rātou awa o Pātea, ki te whenua e mohiotia nei ko Kuranui.
Koia te kōrero a te kaikaunihera i te wari Māori o Taranaki ki te Tonga, a Tuteri Rangihaeata mo te hirahiratanga o tana puta i tenei wahanga o te tau.
“Ae e pupu ake ana te aroha kua puta mai tēnei taonga nō tuawhakarere i roto i tēnei tuāhuatanga o te wa o Matariki, Puanga kia mātou o Taranaki, noreira e hurō ana te kainga kua puta mai anō tēnei waka, heoi anō me ngā tohu o te wā nē rā.”
I hahūtia te waka i te whenua e kīa nei ko Kuranui, e rua kiromita te tawhiti i te pāpuni wai o Pātea, ā, hei tā Rangihaeata anō, nō ngā uri o te tupuna a Ngawaka Taurua te whenua nei.
“…te whenua rā ko Kuranui, i noho mai te rangatira i ngā rā kua pahure atu ko Ngawaka Taurua, me ōna kato, me ōna taurahere, me ōna tangata e noho i reira ko Te Pakakohi tērā, nō reira ko Kuranui te whenua, ko Pātea, ko Taikehu ki ētahi, te awa, i reira e noho ana ngā tangata e hono ki te iwi o Te Pakakohi.”
Hei tā ngā ripoata kei Ngamotu te waka e tiakina ana i tenei wa, ā hei tā Rangihaeata kei te manako nui ia ka whakahokia te waka ki a ratou ano.
“Ko te wawata i te wā e mutu ake ngā scientists ngā archaeologists ā rātou nei mahi ko te wawata o te kainga me whakahoki atu ki te whare taonga o Pātea.”
Tēnā whakarongo ki te uiui katoa ki konei.