May 30, 2023
He teka te kōrero mō ngā tohu reo Māori: Teina Boasa-Dean
He teka noa ngā kōrero ka piki ake ngā nama aituā motoka ki te whakareorua i ngā tohu huarahi o te motu.
Koia te kōrero a te mema poari o Te Matawai, a Teina Boasa-Dean, ki ngā kōrero o te Pāti Nāhinara mō te whakatū i aua tohu rā.
Hei tā Boasa-Dean, inā rawa kē te nui o ngā mate huarahi, ahakoa kāore anō ngā tohu hou kia puta.
“Koinei tāku e whakapae nei, kāore rā he kiko, he take, o te tuku mai i tēnā pōhēhē nui mehemea ka reorua katoa te ingoa o ngā tohutohu i runga i ngā rori o Aotearoa, ā, ka tū tēnā ki te whakararuraru anō i a tātou o Aotearoa, i te mea hoki, ara kē, ara kē. Kua piki haere ake anō hoki te rahi o te tangata i mate ana i ngā rori o Aotearoa. Engari kāore he tohutohu Māori i runga i ngā rori i aua wā rā.”