June 20, 2018
He Whare Pupuri Taonga mo te Rua Tekau mā Waru
He Whare Pupuri Taonga mo te Rua Tekau mā Waru
Kei te huri haere tētahi rōpu i te motu i tēnei wā ki te wānanga i te whakaaro kia tū he whare pupuri taonga ki te Rua Tekau mā Waru ki roto o Waitangi. Hei taa Hemana Waaka, he kaupapa whakahirahira tēnei, engari he aha ai ka whakaritea tēnei wāhi whakamaumaharatanga ki Waitangi. E ai ki ōna kōrero, e whā ngā kamupene o te Rua Tekau mā Waru, no ngā rohe puta noa i te motu, a, kia whakatū rātou i o rātou ake whare pupuri taonga, peeraa ki te Whare Maumaharatanga mo te Kamupene C kei te Tairāwhiti.
He Tumu Whakahaere Hou mo Ako Aotearoa
Kua tohua e Ako Aotearoa, a Helen Lomax o Te Aitanga-a-Māhaki hei tumu whakahaere. Mai rā ano i te marama o Huitanguru, kua āta nōhia e Lomax taua tūranga, engari, kātahi anō ka mana. Hei taa te heamana o Ako Aotearoa, a Graeme Benny, kāore e kore ka tino whai hua a Ako Aotearoa i te mōhiotanga o Lomax ki ngā āhuatanga o te ao mātauranga me āna mahi nui i roto i ngā tau ki te whakawhanake i te mātauranga Māori.
He Rautaki mo te Tiaki ngā momo Tuna
Kua timata te rōpu o Te Tini a Tangaroa, ara Fisheries NZ, ki te whakahaere hui puta noa i te motu, ki te rapu whakaaro, me pehea te tiaki i ngā kūwharuwharu me ērā momo o te whānau tuna. Hei taa te kaiwhakahaere i ēnei hui, a Steve Halley, tērā pea ka panonitia te ture mo te maha o ngā tuna ka taea te hopu. Hei taa Halley, kei te māharahara rātou ki te taupori kūwharuwharu i te Ika-a-Māui, arā, kāore i te piki.
He Huarahi Hou mo te Manatū Oranga Tamariki
Hei taa te Komihana Tamariki a Tracey Martin, tokomaha rawa ngā tamariki e tukuna ana e Oranga Tamariki ki ngā ratonga, ki whānau kē rānei, a, ko tōna hiahia kia ngāna a Oranga Tamariki ki te kimi huarahi e noho tonu ai ngā tamariki whakaraerae ki roto i o rātou ake whānau. Hei taana, kei ngā iwi ētahi rautaki e tika ana kia whāia e te Manatū Oranga Tamariki. Ono mano tamariki kei raro i ngā ratonga i tēnei wā e tiakina ana, ono tekau ōrau o ērā he Māori.
Copyright © 2018, UMA Broadcasting Ltd: www.waateanews.com