Listen Now: 
Te Whakatau o Te Whare Herehere o Waikeria
Hei te ahiahi nei ka puta he whakatau i te Minita i ngā take Whare Herehere, arā, i a Kelvin Davis, mō te anamata o te whare herehere o Waikeria. Nō te tau 1910 i whakatūria ai taua whare herehere, ā, e ai ki ngā kōrero, kua tino kanukanu i roto i ngā tau. Kua whakakorengia kētia e Davis te whakaaro kia whakatūria he whare herehere nui hou ki reira, kotahi piriona tāra te uara. E ai ki ngā whakapae, ka kii ia i te rā nei, ka whakahoutia ngā wāhanga o te whare herehere kia pai ake ai tōna āhua.
Tūtaki a Ezekiel Raui i te Kuini
Kei te tūtaki tētahi o ngā rangatahi o te hapori o Whatuwhiwhi i te Kuini. Hei āpōpō ka wehe atu a Ezekiel Raui ki Ranana ki te tiki i tana tohu i te Kuini, mō tana whakatū hōtaka rangatahi e turaki ana i te mate whakamomori. Hei tāna, ko te whakaaro mo taua hōtaka Tū Kotahi i hua ake i te matenga whakamomori o tana hoa e rima tau ki muri.
He Marae mō Te Kawerau-a-Maki
E ora tonu ana te wawata o Te Kawerau a Maki kia tū he marae ki te poho ō tō rātou rohe. Kua whakaae te Kaunihera o Tāmaki kia whakamahia e te iwi he whenua i Te Henga hei marae, hei papakainga mō rātou. He mea tohu taua whenua e te iwi o Te Kawerau a Maki me te Kaunihera o Waitakere i te tau 1995 hei waahi mo te marae o Te Kawerau-a-Maki, ko te ingoa o taua whenua ko Waiti.
Ngā Painga o Whānau Ora
Hei tā te Ūpoko o te ratonga whānau ora o Te Wai Pounamu, arā, o Te Pūtahitanga, a Helen Leahy ko te hua nui o Whānau Ora ki Aotearoa, ko tana noho hei kaupapa kawe i ngā take e hāngai pū ana ki ngā whānau Māori, i waho atu i ngā tari o te Kāwanatanga. I tae atu te ohu e aromātai ana i a Whanau Ora ki Otautahi inanahi, he ohu i whakatūria ai e te Minita Whānau Ora e Peeni Henare. Hei tā Leahy, he maha ngā kōrero angitū mō Whānau Ora i horahia atu e ia ki mua i taua ohu.
Whakakorengia te Ture Hara Toru
Kua takatū ake a Aotearoa Tuatahi ki te turaki i te hiahia ō tō rātou hoa Kāwanatanga, arā, o Reipa, kia whakakorengia te ture hara toru. I te ngana te Minita i ngā take Ture a Andrew Little ki te kōkiri i te whakakoretanga o taua ture ki mua i te aroaro o te Rūnanga Minita o te Kāwanatanga i tēnei wiki, engari, nā Aotearoa i kore ai. Hei tā Shane Jones o Aotearoa Tuatahi, ehara i te mea e whakanano ana i te whakaaro o Reipa, engari, e hiahia kē ana rātou o Aotearoa Tuatahi kia hōhonu ake te wānangahia o te whakahoutanga o te pūnaha ture o tēnei whenua.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
