Kainga Koretanga ki Te Puea
Kei te whakatū te marae o Te Puea i Māngere i tōna ringaringa kia whai waahi rātou ki te rautaki whare hou a te Kāwanatanga, kotahi rau miriona taara te uara. Nā te peremia, arā, nā Jacinda Ardern rāua ko te Minita i ngā take Whare, a Phil Twyford tēnei rautaki i whakapuaki mai i te marae o Te Puea i te rā mere o tērā wiki. Hei tā te ūpoko o te marae a Hurimoana Dennis, kua hanga rautaki kē te marae o Te Puea hei turaki i te kainga koretanga i waenganui i te iwi Māori, ā, me whai waahi tā rātou rautaki ki roto i te rautaki ā te Kāwanatanga.
Tāhae Pūtea mai i Pārengarenga 3G
Kua whakaae tētahi tarahiti ō mua ō tētahi poraka whenua i te Tai Tokerau, nānā te tata ki te kotahi miriona taara o te tarahiti i tāhae. E toru ngā hāmene raweke, tāhae pūtea hoki i rapaina atu ki a Margaret Dixon. Ko tana tungāne hoki, a Stephen Henare tētahi atu e hāmenetia ana mō te tahae pūtea i te Tarahiti o Pārengarenga 3G. Hei te marama o Hongongoi, ka whakawhiua a Dixon. Kei te whawhai a Henare ki ngā hāmene.
Kōnae Wai ki a Marama Davidson
Hei tā Marama Davidson, e harikoa ana ia kei a ia te kōnae mo te wai i roto i te Roopu Kākāriki inaianei, ā, ma tana kawe i taua kōnae, ka whai mana ia ki te kōkiri i ngā hiahia o te iwi Māori mō te mana o te wai. Katahi anō te roopu Kākāriki ka tūkarikari i ngā kawenga kōnae o te roopu, ā, kua riro i a Davidson, te kaiarahi takirua hou, ngā kōnae mō te wai, ngā tamariki me te whakawhanake ōhanga.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
