Listen Now: 
Te hokotanga o te P
Me whakapau pūtea te Kāwanatanga ki ngā kaupapa e taami ana i te hokotanga o te P, otirā, e whakaora ana i nga tūroro o te P. Koirā te karanga a Tuuta Ngarimu, kaiātete i te P. Hei tāna, kua whakapau pūtea te Kāwanatanga ki te ārai i te taenga o te P ki tēnei whenua, ēngari, ahakoa tērā kua kino kē ake te horapatanga o te P. E hiahia ana a Ngarimu ki te whakatū whare hauora ki Te Tairāwhiti, ko te matū o taua whare he whakaora i ngā tūroro o te P, nā te mea, hei tāna, kei te haehae te P i ngā whānau o te rohe.
Ngā whenua i te taone o Tauranga
Kei te kōrero ngā iwi o Tauranga Moana ki te haahi mihingare kia whakahokia mai e te haahi ngā whenua i te pokapū o te taone o Tauranga kua rua rau tau e puritia ana e te haahi. Hei tā Buddy Mikaere, māngai mō ngā iwi, i riro ngā whenua nei i te haahi i te tau kotahi mano, waru rau, toru tekau, ēngari, i reira te here kia whakahokia mai ētahi wāhanga o aua whenua ki te iwi ā tōna wā. Heoi, i muri i ngā riri whenua o te motu, ka tuohu te haahi ki te Karauna, ka tuku i aua whenua ki ngā Pākeha hei waahi noho mō rātou.
Kōiwi o tētahi hoia o Aotearoa ki Hāmoa
Kei te whenua o Amerika Hāmoa te Ope Kātua i te rā nei e hahu ake ana i ngā kōiwi o tētahi hoia o Aotearoa i tanumia ki reira. I roto a Russell Moore i te Ope Tauā moana, nā wai ka mate, ka tanumia ki te urupā o Satala. Koia tētahi o ngā hoia e hahua ake ana i raro i te kaupapa Te Auraki, he kaupapa e whakahoki mai ana i ngā kōiwi o ngā hoia o Aotearoa i tāwāhi ki te kainga.
$500,000 ki a Reremoana Theodore
Kua whakawhiwhia a tākuta Reremoana Theodore he kairangahau no te Whare Wānanga o Otakou, ki te $500,000, kia pai ai tana rangahau tonu i ngā take e ora roa ai te Maori. Koia te tuatahi kia whakawhiwhia ki tēnei karahipi, e kiia nei ko te health research emergency leader fellowships. Hei tāna, ka titiro ki ngā kaupapa whānui e whai waahi ana ki te oranga o te tangata, pēnei i tana ako i a ia e tamariki ana, he aha ngā hua o te whai mātauranga i te wā e taiohi ana, he aha hoki ngā hua ka puta ki te hauora o te tangata me te ao mahi o te tangata i roto i te whai tohu i te whare wānanga.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
