Ūkuia te tohu Tā i a Bob Jones

Ko te mea pai o te petihana e whai ana kia ūkuia te tohu tā i a Bob Jones, ko te whakamōhio atu ki te marea, kua hōhā te Māori i ngā whiu kōrero, whiu whakaparahako a iwi kē. Koirā tā Willie Jackson, Minita i ngā take Whai Mahi. Na te kaihanga kiriata, na Renae Maihi te petihana i whakatere, whai muri iho i ngā kupu tāwai a Jones e pā ana ki te Māori me te rā o Waitangi. Hei tā Jones, he pukuhohe noa iho, engari, hei tā Jackson, kaore tātou i kata

Waihanga rautaki hou mo te rāngai Rawa Ika

E ai ki te Minita i ngā take Rawa Ika a Stuart Nash, kei te waihanga rautaki hou ia mo te rāngai, engari, tino kore rawa atu nei ia e arokore ki te mana o te Māori i roto i taua rāngai. Ko Nash tētahi i kōrero ki te hui-a-tau a ngā roopu me ngā umanga rawa ika Māori i Tāmaki inanahi. Kei te werohia a Nash e Tā Tipene O’Reagan, kia ū tonu ki ngā whakaritenga o te ture rawa ika Māori o te tau iwa tekau mā rua, me ngā rautaki kei roto i taua ture hei tiaki i ngā rawa ika Māori mo ngā whakatipuranga.

Whakataetae Hi-Tech Awards

E rua ngā umanga matihiko Māori kua whai waahi ki ngā whiringa mutunga o te whakataetae Hi-Tech Awards. Ko Kiwi Digital te tuatahi mo tana waihanga hangarau hou hei āwhina i ngā kaihanga kiriata, kaihanga hōtaka pouaka whakaata ki te uta reo taketake ki runga i ā rātou whakaputanga. Ko te tuarua ko te umanga Straker. Ka pānuitia mai ngā toa hei te rua tekau mā rima o Haratua ki Horncastle Arena i Ōtautahi.

Hui Āranga ki Ohakune mo ngā Katorika Māori

Kei te whakawhāiti atu ngā Katorika Māori ki Ohakune mo tā rātou Hui Āranga. Hei tā Che Wilson o Ngāti Rangi, i tīmata tēnei hui i Ōtaki i te tau 1946. Hei tāna, ko te kaupapa matua, he whakanui i te āranga o Ihu Karaiti mā roto atu i te kapa haka, te hākinakina me te ngahau. Hei tāna, koinei te whakataetae kapa haka tino tawhito o te katoa. Kotahi mano rima rau tāngata ka tae atu ki te hui nei ka tū ki te Kāreti o Ruapehu.

Follow us on &

Copyright © 2018, UMA Broadcasting Ltd: www.waateanews.com