March 26, 2018
Whakaae a Ngāti Whātua Ōrākei ki te Ipu Amerika
Whakaae a Ngāti Whātua Ōrākei ki te Ipu Amerika
Heoi, e rata ana, e whakaae ana a Ngāti Whātua Ōrākei ki te mahere hou mo te whakataetae Ipu Amerika ka tū ki te Waitematā a tērā tau. Kaore a Ngāti Whātua i whakaae ki te mahere tuatahi, i whai nei ki te whakaroa i te wahapū mā te whitu tekau mā rima mita. I hoki te Kaunihera o Tāmaki me Tīma Aotearoa ki te whiriwhiri anō me pēhea, ā, kua toko ake i a rātou he mahere hou e paingia nei e Ngāti Whātua Ōrakei.
Karahipi Te Moananui a Kiwa Ngarimu
Tokorua ngā tauira tohu kairangi o te Whare Wānanga o Tāmaki kua whakawhiwhia ki nga karahipi a Te Moananui a Kiwa Ngarimu. Kei te rangahau a Jamie-Lee Rahiri o Ngāti Porou, Ngāti Whātua ki Kaipara me Te Atihaunui-a-Papārangi i ngā āhuatanga o te mahi hāparapara, ā, ko te kaupapa rangahau a Pauline Adams o Te Whānau-a-Apanui, ko te mātauranga. Ko te hunga tohu paerua e whai karahipi ana, ko Te Puoho Katene, Kimiora Kaire-Melbourne me Te Aorere Pewhairangi.
Ngā whiu kōrero a Jones ki a Araraurangi Aotearoa
E tautoko ana ngā Māori i roto i ngā rohe i ngā whiu kōrero a Shane Jones ki a Araraurangi Aotearoa. Kua hia wiki a Jones, Minita Whakawhanake Rohe e tātā ana i a Araraurangi mo tā rātou tuporo haere i ngā rerenga ki ngā rohe nohinohi. Hei tā Graham Hingangaroa Smith, tāhūhū rangapū o Te Wānanga o Awanuirangi i Whakatane, ahakoa te pai o Rererangi Rekohu arā, Air Chathams, he uaua te kawe manuhiri ki te wānanga, i te korenga o Araraurangi Aotearoa.
Copyright © 2018, UMA Broadcasting Ltd: www.waateanews.com