March 06, 2018
Te mau pū ki ngā kura
Te mau pū ki ngā kura
E rapu kōrero ana te Tari Mātauranga mo te wāriu o te whakaako ki ngā tamariki, me pēhea e mau pū mo te haere ki te puihi, mo te puhi rakiraki, mo te whakangau poaka otirā, mō ngā kaupapa ngahau. Ahatia e mea ana te KKM o Rāwhitiroa i te Taitokerau kāre he take o ngā pū i tō rātou kura, kua mahue ki muri ngā pānga ki te pū matā.
Jacinda Ardern ki Niue
He whakatupu kaupapa ōhanga, he whakakaha hononga a iwi te pūtaketanga o te noho a te Pirīmia a Jacinda Ardern inanahi i te moutere o Niue. Kei raro i te whakaruruhau o Aotearoa a Niue. Hai tā te haukāinga nā te toha pūtea ki a rātou kua piki mārika te maha o ngā tūruhi e taetae atu ai ki a rātou. Hai tā te Pirīmia, he mea nui hoki te rerenga o Air NZ ki reira e rua ngā wā ia wiki, ia wiki.
Me piki ki ngā wāhi teitei
Mehemea ki te whati ko ētahi ngaru nui ki ngā taone o te Tairāwhiti me piki ki ngā wāhi teitei ka ora. Koia te karere a kaipūtaiao William Power o Pōneke, kua roa ia e tirotiro ana i ngā pānga o ngā rū whenua me ngā ngaru nui. Hai tāna mena ka rū kino i te takere o te moana ki te rohe moana o Hikurangi, mā ngā waahi haumaru e tiaki te nuinga.
Wehe a Steven Joyce i a Nahinara
Kua heke a Steven Joyce i tana tūranga mo te roopu Nāhinara whai muri i ngā tau 10 i te taumata teitei me āna hoa tata a Bill English rāua ko John Key. Ahakoa kaore ia i hautū i a Nāhinara, nāna ētahi kōpaki whakahirahira i whakahaere. Heoi anō e ngahoro haere ana ngā tautōhito o taua roopu toorangapū whai muri tō rātou matenga i te kōwhiringa pooti me te tupu matomato o Jacinda Ardern.
Teitei te pā mahana o tēnei raumati
Kāre he raumati pēnei rawa te teitei o te pā mahana koni atu i tēnei kua pāhemo. E mea ana te kōrero kua tere ake ngā hau mahana o te raki, ā, e meingatia ana ko te huringa o te āhuarangi arā climate change koia te rerekētanga. Kei te kī te roopu tirotiro tohu Tāwhirimātea o NIWA atu i a Tamanuiterā me ngā hau, ko te ua te mea kino ake. Nā te kino o te ua tātā kua horo te whenua, kua katia ngā kura me ngā tauranga wakarererangi, kua whakatahia ngā kāinga.
Whakataetae kapahaka ki Te Papaioea
Kua riro i a Kairanga Kai Kiore te whakataetae kapa haka a rohe o Rangitāne nō te tau 2014, engari nā tō rātou ngarohanga i tēnei wā ka rongohia e te iwi whānui. I tēnei tau ka ara ake i ētahi roopu hou mā ngā mema o mua o kairanga aua kapa hou e whakapakari. Hai tā Lewis Karaitiana o te iwi ko te hiahia kia whakakotahi i te hapori Māori ma te noho tahi i tētahi taiao Māori arā o te kapa haka. A ēnei rā whakatā ka tū ngā roopu e ono ki te atamira ki te Papaioea.
Copyright © 2018, UMA Broadcasting Ltd: www.waateanews.com