Tūranganui-a-Kiwa hei ingoa mō Poverty Bay

Tūranganui-a-Kiwa hei ingoa mō Poverty Bay

Kei te rere te pātai i te Kaunihera o Tūranganui-a-Kiwa ki ngā tāngata o te hapori, mēnā rā e hiahia ana rātou kia tū ko te ingoa o Tūranganui-a-Kiwa hei ingoa mō Poverty Bay. Hei tā Keita Kohere, tumu tauwhirowhiro Māori o te Kaunihera, nā Kāpene Kuki te ingoa Poverty Bay i whakaara ake i tana ūnga ki reira i te tau kotahi mano, whitu rau, ono tekau mā iwa. Hei tā Kohere, me whakaputa te hunga o te hapori i o rātou whakaaro, kātahi ka kōkirihia te kaupapa kia panonotia te ingoa, ki te Poari o Ngā Pou Taunaha.

Konei tētahi roopu kaipakihi iwi moemoeā nō Ahitereiria

Kua tae mai tētahi roopu o ngā kaipakihi iwi moemoeā nō Ahitereiria ki konei, ki te hui ki ngā Minita Māori o te whare pāremata, ngā iwi me ngā pakihi Māori. Hei tā te Komihana o Ahitereiria, a Andrew Cumpston, e hiahia ana te roopu nei ki te wānanga me te ako i te angitū o ngā pakihi Māori me te ōhanga Māori, tae atu rā ki te kimi huarahi e taea ai te mahi tahi. Hei tāna, tekau mā ono mano pakihi o roto o Ahitereiria, nā ngā iwi moemoeā i whakatū, ko te uara o ēra pakihi, he kotahi piriona tāra ia tau.

Whakatūnga o te pou haki ki Kororāreka

Nā Ngāti Hine te Kawana Tianara, a Kahurangi Patsy Reddy i manaaki inanahi, i tētahi hui hei tohu i te kotahi rau, ono tekau tau i te whakatūnga o te pou haki ki Kororāreka. Tōna rua rau tāngata i tae atu ki taua hui i tū ki te puke o Maiki i Kororāreka i te ata inanahi. Nā Hone Heke taua pou haki i tope ki raro i ngā wiki i muri iho, nā wai rā, ka tīmata ngā riri whenua ki roto o Te Tai Tokerau.

Whakaaetanga hoko whenua a Ngāti Paoa

E hiahia ana te māngai mō Reipa e tū ana ki te kōwhiringa pooti motuhake ki te tūrū o Maungakiekie kia tirohia anō te whakaaetanga i hoko whenua ai a Ngāti Paoa ki Point England. Ko Josephine Bartley te toihau o te Poari Hapori o Maungakiekie, ā, e tū ana ia mā Reipa i te kōwhiringa pooti motuhake ki taua tūru. Hei tāna, i makihohoro te Kāwanatanga o mua, arā, a Nāhinara ki te whakaoti wawe i taua whakaaetanga, i hoko whenua ai te iwi kia tū ai ētahi kaupapa whare ki reira.

Follow us on &

Copyright © 2018, UMA Broadcasting Ltd: www.waateanews.com

RELATED NEWS

Press Release Te Kōhanga National Trust Board Election Results 2021 Education innovation rewarded TPP too risky for Maori Party