Kaupapa tuku moni Ngā Tangata Microfinance

Kei te angitū te kaupapa e whai ai ngā whānau i te pūtea hua moni kore kia taea ai e rātou te hoko whare, otirā, kia kore ai rātou e tahuri ki ngā pakihi e kiia nei, he mako taurewa. Ko te ingoa o te kaupapa tuku moni nei, ko Ngā Tangata Microfinance, ā, e ai ki ngā kōrero ko te nuinga o ngā kiritaki o te kaupapa nei, he wāhine takakau e tiaki ana i ā rātou tamariki. Whā tekau mā rua o ngā kiritaki, he wāhine Māori. Nā te Whare Wānanga o Tāmaki te rangahau i puta mai ai ēnei tatauranga.

Hui e ono mō ngā tono raupatu ō Ngāpuhi

E ono ngā hui i oti i te Minita i ngā Take Tiriti i a Andrew Little i ngā rā e rua noa nei, kia mōhio ai ia e rere pēhea ana ngā whakaaro o ngā hapū ō Ngāpuhi mō tā rātou tono raupatu. Hei tā Rudy Taylor o Te Kotahitanga, i mārama te kōrero a ngā hapū ki te Minita, arā, kaore i a Tūhoronuku te mana ki te kōrero mō rātou, ā, ko te pūrongo Maranga Mai te huarahi whakamua. Hei tā te toihau o Tūhoronuku a Hone Sadler, e koa ana ia kua whakaputa whakaaro ngā hapū ki te Minita, engari, me kaua rātou e pōhēhē ka whakaae a Little, otirā, te Karauna, ki tō rātou hiahia kia whakatau i ngā tono raupatu ā tēna hapū, ā tēna hapū.

Whakaaetanga a Ngāti Whātua Ōrākei me Ngāti Paoa

E mihi ana a Ngāti Whātua Ōrākei i tā rātou ko Ngāti Paoa whakaaetanga, me te mea nei, he kī whakatumatuma ki te Karauna, mā mātou ā mātou take e whiriwhiri, kaua mā koutou. Hei tā Ngarimu Blair, nā te waitohutanga o tēnei whakaaetanga, ka kore ngā iwi e rua nei e pakanga ki ā rātou anō ki roto i te Kooti. Kia ahatia, hei tāna, ka haere tonu a Ngāti Whātua Ōrākei ki te kooti matua ki te tohe ki te Kāhui Iwi o Marutūahu, nā te mea, hei tā Whātua, e takoto ana ētahi wāhanga o te tono raupatu a Marutuahu ki ngā pātanga rohe o Whātua. Hei tā Ngarimu Blair, menā ka kauanuanutia e Marutuahu ngā pātanga rohe nei, ka kore tēnei take e tae ki te kooti. Hei tāna, kaore e taea te kī, e rua ngā iwi mana whenua ki te wāhi kotahi.

Auahi Kore Aotearoa 2025

E whakatenatena ana a Hāpai Te Hauora i te Minita hou e kawe ana i te kaupapa kia auahi kore a Aotearoa hei te tau rua mano rua tekau mā rima, kia aronui ki te whakatū kaupapa hei aukati i te taenga mai o ngā rauemi tūpeka hou ki tēnei whenua. Hei tā te tāhūhū rangapū o Hāpai, a Lance Norman, i tōna tikanga kia mārama te Minita hou, a Jenny Salesa ki te kino o te tūpeka i waenganui i ngā hapori iwi moutere me ngā hapori iwi Māori. E tautoko ana a Hāpai Te Hauora kia more ngā mōkihi tūpeka, kia piki te tāke ki runga i te tūpeka, me te whakatū ārai kia kore ai ngā rauemi tūpeka hou e tae mai ki konei.

Follow us on &

Copyright © 2017, UMA Broadcasting Ltd: www.waateanews.com