Listen Now: 
Poho kererū a Flavell
E pouri ana te kaiarahi i te RTM, a Te Ururoa Favell, e kore ia e whai waahi ki te whakatutuki i ētahi kaupapa e tārewa tonu mai ana, heoi, e poho kererū ana ia ki ngā kaupapa i tutuki i a ia, i roto i te tekau mā rua tau ōna i te whare pāremata. I riro te tūru o Flavell, arā, te tūru o Te Waiariki i a Tamati Coffey i te rā horoi.
Kaiwhakahaere hou Kaunihera o Rotorua
Hei tā te kaiwhakahāere kaupapa Māori hou o te Kaunihera o Rotorua, ma tōna tūranga e whai waahi ai te iwi o Te Arawa ki te ārahi i ngā kaupapa taiao, kaupapa pāpori me ngā kaupapa ahurea o te rohe. He roia a Gina Rangi, ā, koia hoki tētahi o ngā kaiwhakahāere i te Tarahiti o Tauaropaki i Taupō. Hei tā Geoff Wiiliams, tāhūhū rangapū o te Kaunihera o Rotorua, nō rātou te waimarie kua kopoua a Rangi ki tēnei tūranga, ā, he tohu tēnei o te wawata o te Kaunihera kia mahi tahi ki te iwi Māori, otirā, ki te iwi o Te Arawa.
Te whakataetae Ipu Ahuwhenua
Ko te kaha o ngā kaiahuwhenua ki te manaaki i te taiao. Koirā tētahi o ngā āhuatanga ka āta tirohia i roto i te whakataetae mo te Ipu Ahuwhenua e whai ake nei. Hei te rua tekau mā whā o Whiringa-a-rangi, ka kati ngā rēhitatanga mo te whakataetae a tēra tau. Hei tā te kaiwhakahāere, a Kingi Smiler, he momo atamira te whakataetae nei e rewa ake ai ngā paamu Māori ki te taumata e tika ana.
Hoko atu ngā whenua o Shelly Bay
Kua whakaae te Kaunihera o Te Whanganui-a-Tara ki te hoko atu i o rātou whenua i Shelly Bay ki te Tarahiti o Port Nicholson. Ka whakatū te tarahiti Māori nei i te toru rau, rima tekau whare ki runga i taua whenua.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
