Listen Now: 
Te Ture Whenua Māori
Ki te Kāwanatanga a Reipa, ka tīhaea e rātou te pire e panoni ana i te Ture Whenua Māori. Koira tā Tāmati Coffey, kaitono i te tūru o Te Waiariki mō Reipa. Hei tā te kaipupuri i taua tūru, a Te Ururoa Flavell o te RTM, i kii a Coffey i tā rāua taukumekume i Whakatane i tēnei wiki, ka raweke noa iho a Reipa i ētahi āhuatanga o taua pire, ēngari, hei tā Coffee, i te kōrero ia mo te ture, kaua mo te pire.
Te hononga o te Paati Māori ki a Nāhinara
Kaore e taea e te RTM, te kii ake, kāore ō rātou hononga ki te roopu Nāhinara. Koira tā te kaiarahi i a Aotearoa Tuatahi tā Winston Peters. Hei tā te RTM, e pai ana ki a rātou kia mahi tahi ki ā wai ake rānei, ahakoa kō wai te Kāwanatanga, arā, ki a Nāhinara, ki a Reipa rānei, engari, hei tā Peters, e iwa tau rātou e tātā ana i a Reipa, nō reira, e mana kore ana tēra kōrero ā rātou.
100 tau mo te Paremata Māori
Kei te whakapūarehia e Ngāti Haua ana kōputu kōrero rokiroki i te rā nei hei tohu i te kotahi rau tau kua pahure i te hui a te pāremata Māori i tū ki roto i rātou. Ka whakapuarehia, otirā, ka whakaatuhia ngā taonga kōrero me ngā taonga whakaahua o taua rā ra ki runga i te marae o Rukumoana, ā, ka kitea ētahi o ngā tuhinga kōrero mo taua rā, i puta ake i ngā niupepa pēra i te niupepa a Kīngitanga, arā, i Te Paki o Matariki.
Te whakataunga o ngā iwi o Hauraki
E tumanako ana te kaiamo i te whakataunga tiriti a ngā iwi o Hauraki, ka waitohua te whakaaetanga i mua i te kōwhiringa pooti a tēra wiki. Hei tā Paul Majurey o Ngāti Maru, e rua tekau mā waru miriona taara te uara o te whakataunga, tae atu ki ngā whenua o Landcorp i Pouara, me ngā whenua e takoto ana i te rohe o Hauraki, arā, mai i Matakana ki Matakana.
Tohu kaiako matihiko toa o te motu
Kua whakawhiwhia a Sandy Bornholdt o Te Kura o Matapihi i Tauranga Moana ki te tohu, kaiako matihiko toa o te motu. Kua whakawhiwhia ia ki te tohu NEXT Expert Teacher Award mō te āwhina i ngā tamariki o taua kura kaupapa kia mātau ai rātou ki ngā āhuatanga o te ao matihiko.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
