Listen Now: 
Kaupapa taiao o te roopu Kākāriki
Me whai tautoko mātou i ngā iwi mana whenua e tutuki ai tā mātou kaupapa mo te whakatō i te kotahi ira kati rua piriona rākau. Koirā tā Mārama Davidson o Ngā Kākāriki. No ngā rā tata nei i whakatere ai Ngā Kākāriki i tā rātou kaupapa taiao, ā, ko te whakatō rākau tētahi o ngā pou o te kaupapa e ora ai te taiao, otirā, te ahuarangi.
Whānau Ora o Te Waipounamu
Kei te whakapuakihia e Te Pūtahitanga o Te Waipounamu, arā, te ratonga whānau ora o Te Wai Pounamu, ngā hua o tā rātou rangahau e pā ana ki a whānau ora i te rā nei. Nā ngā kairangahau o te whare wānanga o Lincoln rātou i āwhina ki te rangahau, he aha ngā hua-ā-pāpori, ā-pūtea hoki e puta ana i ngā hōtaka whānau ora. Hei tā Helen Leahy, tāhūhū rangapū o Te Pūtahitanga o Te Waipounamu, ki te whai waahi te tangata ki a whānau ora, kāore e kore ka puta he hua-ā-pāpori ki taua tangata, tae atu ki ngā mōhiotanga mo te penapena me te whakatipu pūtea.
Kaupapa nui o Hauraki Waikato
Ko te oranga o te tangata, ko te oranga o te taiao. Hei tā te māngai mo te RTM ki Hauraki Waikato a Rāhui Papa, koirā ngā kaupapa nui e utaina ana e ngā kaipooti o te rohe ki runga i ōna pokohiwi hei pīkau māna ki te whare pāremata. E ai ki ngā tatauranga o te wā, kei muri noa atu a Papa i a Nanaia Mahuta o Reipa, arā, rima tekau ma ono ōrau te nui o te āputa, heoi, hei tā Papa, hei aha atu māna taua tatauranga. E kii ana ngā kaipooti ki a ia, whakatikahia te kāinga koretanga me te tuakōkātanga i waenganui i te iwi Māori.
Moana ki runga i a Air New Zealand
Hei tā Araraurangi Aotearoa, arā, a Air New Zealand, ka tīmata tā rātou whakaatu i te kiriata Moana Reo Māori ki runga i o rātou waka rererangi hei te marama o Whiringa-ā-rangi. No te pō nei i whakapuarehia ai te kiriata reo Māori nei ki te marea. Hei tā te Pou Ahurea Māori o Araraurangi Aotearoa, a Andrew Baker, nā rātou ngā kiripuaki reo Māori o te kiriata i kawe ki LA kia hopukina ai o rātou reo mo te kiriata nei.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
