Listen Now: 
Te Kaunihera Maori
Kua mimiti te kaha me te mana o te Kaunihera Maori ki te korero mo te iwi Maori whaanui, i te tohe i waenganui i a Maanu Paul raua ko Taihaakurei Durie mo te toihautanga o te Kaunihera. Koira taa Felix Geiringer, roia ma te kaunihera Maori. Hei taana, i whakatiitaha tenei tohe i waenganui i enei rangatira e rua, i te whai a te Kaunihera kia tuu ano hei roopu whai mana nui ki te korero mo te iwi Maori nui tonu.
Nga whenua o te rohe o Hauraki
Kua tukuna he petihana ki te Whare Paaremata e tono ana i te Kawanatanga kia tawharau nga whenua o te rohe o Hauraki kei raro i Te Papa Atawhai, i nga umanga maina. Na te taenga atu o te Umanga New Talisman Gold Mines ki te keri haere i te whenua i waenganui i a Paeroa me Waihi i whanau mai ai te petihana nei. Hei taa nga iwi o Hauraki i tautoko i te petihana, he whenua tapu o ratou whenua, me mutu te tukinohia e nga umanga maina.
Nga Wahine mareikura no Taranaki
Hei te po nei ki roto i te whare wananga o Kunenga ki Purehuroa ki Oteha, Tamaki Makuarau, ka tu nga waahine mareikura tokorua no Taranaki ki te korero mo te whakatika i nga hee o mua. He kaiwhakawaa i te Kooti Whenua Maori a Sarah Reeves, a, ko Puna Wano Bryant te toihau o te Tarahiti o te Papakainga o Parihaka.
Te whakataetae Pikihuia
Neke atu i te kotahi rau, toru tekau ringa tuhi pukapuka Maori kua uru ki te whakataetae Pikihuia i tenei tau. Hei te tuawhitu o Mahuru ka panuitia mai nga toa. Hei taa Whiti Hereaka, kaiwhakawaa i te tuhinga paki poto ki te reo Pakeha, miharo ana te hohonu o nga puukenga tuhi a tena, a tena. Hei taa te kaiwhakawaa i nga tuhinga ki te reo Maori, a Poia Rewi, a, he maha nga kaupapa i tuhia ai, mai i te ru whenua, ki te whutuporo, ki nga mahi ki runga i te marae aatea.
Te Waimangu Volcanic Valley
Kua mana te hoko a Ngati Rangitihi me Tuhourangi i te umanga e kiia nei ko te Waimangu Volcanic Valley, tata ana ki Rotorua. Hei taa Ken Raureti o Ngati Rangitihi, ko te hokotanga o Waimangu tetahi wahanga o taa ratou rautaki pakihi, otira, me taa ratou rautaki ahurea e hono ano ai ratou ki o ratou whenua tupuna.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
