Te whakatau a Reipa

Te whakatau a Reipa

E ai ki te roopu Reipa ka whakatuuria e ratou he Ratonga Whare Maori mena ra ka Kawanatanga ratou. Na te mangai torangapu mo Te Tai Tokerau, na Kelvin Davis tenei Ratonga hou i panui mai, i te whakarewatanga o te kaupapa pooti a nga kaitorangapu Maori o Reipa i runga i te marae o Nga Whare Waatea Marae inanahi. Tona kotahi rau taangata i tae mai ki te marae nei ki te tautoko i te whakarewatanga, a, hei taa Davis, ka whakatuuria e Reipa te kotahi mano whare paapori ia marama.

Tahae te wai o Ngati Wai

I pati i te iwi, katahi ka tinihanga i te iwi. Koira taa nga mangai o Ngati Wai mo te tono a te tangata whai rawa ra no Ruhia, a Alexander Abranov, kia tangohia te ono tekau mano rita o te wai o te awa o te rohe hei taauwhiuwhi ki runga i tana papa mautii. No Abranov tetahi whare nui rawa atu i Whangaruru, ko te Helena Bay Lodge te ingoa, a, i tuku mahi ia ki nga uri o te iwi kia whakatuuria e ratou tenei whare oona. Inaianei, e hiahia ana ia ki te taahae i te wai o too ratou awa.

Te mate whakamomori i Te Tai Tokerau

Kaua e whakamahi i nga tatauranga whakamomori i roto i te Tai Tokerau hei whutuporo torangapu. Koira taa Arthur Harawira, kaimahi hapori i Kaitaia. I mate te tama a Harawira i te whakamomori, e rua tekau ma tahi tau ki muri, na kona, ka whakatuuria e ia te roopu Fathers Against Suicide. Hei taana, ko te tautoko taana e hiahia nei hei turaki i te mate whakamomori i waenganui i nga rangatahi o Te Tai Tokerau, hei aha te whakatairangatia e nga roopu torangapu ano nei he kaupapa minamina pooti maa ratou.

Me utu a Turei i te putea

Kua puta te whakahau i te Uniana Kaiutu Taake o Aotearoa kia whakahoki a Metiria Turei i te putea i tahaengia ra e ia i te Tari Whakahiato Ora, i a ia e whiwhi ana i te penihana i nga wa o mua. Hei taa te Upoko o te Uniana, a Jordan Williams, kua tatau ratou, a, hei taa ratou e rima tekau ma whitu mano taara te nui o te putea hei whakahoki ma Turei ki te Tari Whakahiato Ora.

Pare Hauraki me Tauranga Moana

Kua taarewahia te tohe ki waenga i a Pare Hauraki me Tauranga Moana i teenei wa. Inanahi raa, puta ai te whakatau a te minita i ngaa take tiriti a Chris Finlayson, kaaore te whakataunga tono tiriti a Pare Hauraki, e whanake ake ina kei te tuutuu tonu te puehu ki waenga i a raatou me Tauranga Moana.

I tukua atu e Nanaia Mahuta o Reipa i te wero ki a Chris Finlayson, ki te kimi whakautu hei whakatau, hei whakaute raanei i teenei take. E aii ki a Finlayson, he kaupapa piere nuku, he kaupapa e tika ana kia aata wetewete i ngaa poowhiwhi katoa no reiraa, me aata haere.

30 tau o Te Taura Whiri i te reo Maori

Ehara i te mahi maamaa te whakarauoratanga o te reo Maaori i roto i ngaa toru tekau tau. Koiraa taa Ngaahiwi Apanui, taahuhu rangapu o Te Taura Whiri i te reo Maaori. I teenei wiki, ka whakanuia e taatou ngaa tau toru tekau i te whakatuunga mai o Te Taura Whiri i te reo Maaori. E aii ki a Ngaahiwi, he timatanga noa iho eenei tau toru tekau, ka mutu, ko ngaa mahi aroturuki i ngaa hua o te puutea kua tukuna atu ki ngaa kaupapa reo Maaori, teetahi o ngaa tino wero i roto i ngaa tau.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Quota limits raise Māori med school challenge Ngāpuhi critic feels rushed by vote Tohu marks Ngati Whatua gift to Auckland