Listen Now: 
Me whakapakari ake ngaa kaiako
Mena e whai whakaaro ana tatou ki te whakauu i te reo Maori ki roto i nga kura katoa o te motu, me whakangungu i nga kaiako ki te whakaako i taua reo i te tuatahi. Koira te whakahau a Ally Gibbons. tumuaki o te Kura Kohine o Rotorua. Whitu tekau ma waru oorau o nga tauira o te Kura Kohine o Rotorua, he Maori, no reira, e tino tautoko ana ia i te whakaaro kia ako te katoa o nga tauira, ahakoa ko wai, i te reo Maori, engari, me ata rautaki i te whakauunga o te reo ki nga kura, ka tika.
He aha te hua o ngaa tuuru maori?
E whakatumatuma ana etahi o te ao Maori ki te karanga a Winston Peters kia pootihia te oranga tonutanga o nga turu Maori. Hei taa Nanaia Mahuta, mangai mo Hauraki Waikato, kei te ngana noa iho a Peters ki te tahae kaipooti i a Nahinara.
Tino hee te koorero a Winston Peters
Hei taa Roihana Nuri, kaiwhakahaere matua o Q & A, kei te mohio a Peters, ka tautokohia tenei whakatau aana e pa ana ki nga tuuru Maori, e te tini o nga kaipooti, a, ma reira, ka riro maana te Kawanatanga e whakawaahi.
He hui wai maori nui e haere ana
Kei te whakahaere hui nui ki roto o Whanganui i tenei wiki, ko 'Te Wai Maori' te ingoa. Ko tona matua, ko te matapaki rautaki e ora ai te whanau tuna. Ko Ken Mair te kaiarahi i te hui nei, a, kei reira nga matanga putaiao, nga iwi me nga pakihi e korero ana mo te tiaki i te wai, me te tiaki i nga koiora kei roto e noho ana, penei i te whanau Tuna.
Te Puea Marae ka tuuwhera ki te marea i te raa nei
No te ata nei i tuwhera ano ai nga kuaha o Te Puea Marae ki te hunga kainga kore. Hei taa te heamana o te marae, a Huri Dennis, i tenei tau, e rua tekau ma rima noa iho nga whanau ka manaakihia e ratou, a, me putake mai aua whanau i te rohe o Mangere anake. Hei taana, ma te aro ki enei whanau, kaua ki te katoa, ka pai ake taa ratou awhina i a aua whanau ki te kimi kainga, kimi oranga hoki mo nga ra kei mua.
Ehara te mahi a Metiria Turei i te hee
E totara waahi rua ana nga whakaaro ki te whakatau a Metiria Tuurei o ngaa Kaakariki, koia tonu tetahi i tinihanga i nga whakaritenga a te tari whakahiato ora i nga wa o mua kia nui ake ai te penihana ki a ia. Hei taa etahi, me hamene a Turei e nga pirihimana mo te takahi ture, heoi, hei taa Maarama Davidson o ngaa Kaakariki, tokomaha nga whanau e rite ana ki a Turei i nga wa o mua, ara, e oke ana.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
