June 30, 2017
He tautoko hou mo ngaa take paapori
He tautoko hou mo ngaa take paapori
Ma te rauemi hou hei arotake i nga hua ka puta i te whakapau putea ki nga kaupapa paapori, e arahi nga ratonga paapori kia tika ai taa ratou mahi. No te wiki nei i whakarewa ai te Te Whanau o Waipareira i te rauemi nei, me te aha, hei taa Awerangi Tamihere o Waipareira, ma tenei rauemi hou ka tino mohio tatou, mena e whai hua ana te putea e whakapaua ana ki tena kaupapa paapori, ki tena kaupapa paapori.
He hononga hou kua puea ake
Kei te whai nga uri no te Moanaui-a-Kiwa kua hono nei ki te RTM, i te pooti-a-tuuru, i te pooti-a-roopu hoki. Koira taa Tukoroirangi Morgan, Perehitini o te RTM. No te wiki nei i waitohua ai e te RTM he waikanaetanga ki te roopu One Pacific. I whakatuuria e One Pacific te rua tekau ma tahi taangata ki nga kowhiringa pooti-a-rohe o Tamaki i tenei tau, a, e ono tekau mano pooti i haere ki a ratou.
Pehea aua tauira oo taawahi?
Kei te he te nuinga o nga korero e whakapaahotia ana mo nga tauira i haere mai i tawahi ki te awhina i a Reipa i roto i tana kaupapa pooti. Hei taa Kelvin Davis o te roopuu Reipa, i manaakihia aua tauira e Reipa, otira e te marae hoki o Awataha.
He mahi toi hou ki Te Waipounamu
Kei te mahi whitiahua mo nga ringa toi e waru o Ngai Tahu hei whakairi ma te iwi ki te ipurangi. Ko Nga Ringa Toi o Tahu te ingoa o enei whitiahua, a, mo Simon Kaan o Otepoti te whitiahua tuatahi. Ko etahi atu ringa toi ka whitiahuangia, ko te matanga whakairo ra a Fayne Robinson tae atu ki nga uri o te whare pora, a Reihana Parata raua ko Morehu Flutey-Henare.
Ko wai a Rahui Papa ki te peera?
E ai ki te mangai mo te RTM ki Hauraki Waikato a Rahui Papa, kaore e tika ana kia whakaaetia te tono a New Zealand Pure Blue Springs Ltd, kia tangohia he wai i te puna i Putaruru hei hoko ma ratou ki tawahi. Hei taa Papa, me huri tuaraa te Kaunihera o Waikato ki taua tono, kaua rawa e whiriwhirihia, kaua rawa e whakaarohia.
He aha te rongoa whenua maori?
E whai whakaaro ana te Minita Whakanake Maori a Te Ururoa Flavell ki te whakatuu ratonga whenua Maori i raro i nga whakahoutanga ki te Ture Whenua Maori. Hei taa Nanaia Mahuta o Reipa, e rite ana tenei whakaaro o te Minita ki tana Ture mo te Reo Maori me te roopu Te Maataawai i tuu i raro i te mana o taua pire, ara, ka pahawa te aha?
Copyright © 2017, UMA Broadcasting Ltd: www.waateanews.com