April 09, 2017
Te haapori o Patu Taatahi whai muri i te waipuke nui
Te haapori o Patu Taatahi whai muri i te waipuke nui
Kei te tukuna etahi o te hapori o Patu Taatahi kia hoki ki o ratou whare i te ra nei, whai muri iho i te waipuketanga i hua ake i a Huripari Tepora. Heoi, e ai ki nga korero, ko etahi o nga whare kaore e taea te whakaora ano, no reira, ka kainga kore etahi, kia puta ra ano he rautaki e whai whare hou ai ratou.
He aha te hua o te korero a Ardern kia Anne Tolley?
He aroha i kore. Koira te kupu korero e whiua ana e te kaiarahi tuarua i te roopu Reipa, e Jacinda Ardern ki te Minita Whakahiato Ora, ki a Anne Tolley, moona i huri tuaraa ai ki te whakaaro kia whakatewhatewhahia te whakapae, he mea tukino te tokomaha o nga tamariki, i a ratou e tiakina ana e nga tari Kawanatanga i nga wa o mua. Hei taa Adern, kei te rongo tonu nga whanau i te whiu a era tukinotanga i enei ra nei.
Te Pire whakahou Ture Whenua Maori
Ka uaua pea kia tutuki i te Minita Whakawhanake Maori i a Te Ururoa Flavell te pire whakahou i Te Ture Whenua Maori i tenei tau, na te tini o nga whakahee a te Ao Maori. Hei taa Morgan Godfrey, kaituhi koowae ipurangi, me pehea e ture ai tenei pire, mehemea kei te whakaheengia e te maha o nga hapuu me nga kaipupuri whenua Maori.
Nga kura o te Tai Rawhiti e anga whakamua ana
Me ako nga tamariki o nga kura o Turanganui-a-Kiwa i nga momo reo huhua o tenei ao. Koira te hiahia o te kahika o Turanga, o Meng Foon. Hei taana, me neke atu i te reo Pakeha me te reo Maori, a, ko tona reo taketake, ara, te reo hainamana tetahi ano reo hei ako ma nga tamariki kia tuwhera ai nga tatau o te ao ki a ratou.
Te Weranga ki Ngati Ranginui
No nga rangi whakataa nei i maharatia ai e Ngati Ranginui te kotahi rau, rima tekau tau i Te Weranga, ara, i te waa i wera ai i nga hoia o te Karauna nga papa kainga Maori puta noa i Tauranga Moana, na te mea, kaore ratou i whakaae kia inea o ratou whenua. Hei taa Graham Cameron, mangai mo te kaupapa nei, i huraina he pou whakamaumahara, a, i tae atu etahi o nga mangai o te Kingitanga me te iwi o Ngati Haua, ina koa ko to ratou tupuna a Wiremu Tamehana te kaupapa o te pou.
Te Poari hou o te whakawhanake oohanga maori
Kua tohua a Robin Hapi hei toihau o te Poari Whakawhanake Ohanga Maori. Tapiri atu ki a ia, tokowha nga taangata hou o te poari, ko te heamana o Ngati Kuri a Harry Burkhardt, rakahinonga Shay Wright, Awerangi Tamihere no Te Whanau o Waipareira me Steve Saunders, kaiwhakatuu i te Pokapuu Whakatipu Hua Whenua o Te Puna. Nei raa te Minita Whakawhanake Maori, a Te Ururoa Flavell.
Copyright © 2017, UMA Broadcasting Ltd: www.waateanews.com