March 01, 2017
Mahi tahi Te Kohanga Reo me Huia Publishers
Mahi tahi Te Kohanga Reo me Huia Publishers
Kei te mahi tahi Te Kohanga Reo me Huia Publishers ki te hanga rauemi hei awhina i a tatou tamariki ki te ako ki te panui. Hei taa Kararaina Cribb, tahuhu rangapu o Te Kohanga Reo, e rima nga rauemi Ako Panui ka haere ki nga Kohanga Reo katoa, puta noa i te motu. Hei taana, e hiakai ana Te Runanga o Te Kohanga ki te whangai rauemi reo Maori ki nga Kohanga katoa, a, ko Ako Panui etahi kua oti nei i a ratou ko Huia te hanga.
Te Wananga o Aotearoa
Ko te whainga ia kia whakatenatena i nga whanau kia hono ki te Wananga o Aotearoa ki te kapo i te matauranga. Koira te hiahia o te hoe whakatere hou o Te Wananga o Aotearoa, o Bernard Te Paa. Ko te hoe whakatere te tumuaki o Te Wananga ki roto i nga rohe o Tamaki me Te Tai Tokerau. Hei taa Te Paa, ehara i te mea e aronui ana te Wananga ki te whangai matauranga ki nga tauira, engari, ki nga whanau ano hoki.
Te iwi Maori ki te ao hangarau
I hui nga kaipakihi Maori me nga kaiputaiao Maori i nga ra tata nei ki te wananga i te whai waahi o te iwi Maori ki te ao hangarau. Hei taa Te Taka Keegan o Te Whare Wananga o Waikato, ahakoa huri ki hea, kei reira te ao hangarau e pukana mai ana ki a tatou. Hei taana, he mea nui kia ata poipoi tatou i te pito mata Maori i roto i te ao hangarau kia eke ki tona puawaitanga. Hei taana ano, hei nga tau e tu mai nei, ko te matainaina ia, kia noho ko te ao hangarau hei pononga ma tatou, ara, kia kaua tatou e noho pononga ki te ao hangarau.
United Airlines ki Te Puea Marae
No te Kawanatanga te hee i kore ai etahi pahihi no Untied Airlines i kite waahi noho mo ratou i tera wiki. Koira taa te mangai torangapu mo Manurewa taa Louisa Wall. I waea atu a United Airlines ki Te Puea Marae i tera wiki kia manaakihia nga pahihi rima tekau mo te po. Hei taa Wall, na te marae te hia rau taangata kainga kore i manaaki i te takurua i tera tau, me te aha, no te Kawanatanga te hee e raru nei te tokomaha o Tamaki i te korenga o etahi waahi noho mo ratou.
Te rangapu o Wakatuu
Kei te huroo te rangapu o Wakatuu i te whakatau a te Kooti Matua o te motu e whakawaatea nei i te huarahi ki a Wakatuu ki te kokiri i waa ratou tono raupatu ki runga i te rohe o Wakatuu i te tauihu o te waka. He mea whakahotaetae aa ratou tono raupatu e te Kooti Teitei i te tau rua mano tekau ma rima, engari, kua takahurihia tera whakatau e te Kooti Matua. Hei taa Ropata Taylor o te Rangapu o Wakatuu, kua roa ratou e whawhai ana, kua ea nga wawata i te Kooti Matua, no reira, me ahu whakamua inaianei.
Te huritau 21 o Te Huarahi Maori
I whakanui te hotaka akoako o Te Huarahi Maori i te Kura Kaiako o Tamaki, i tona huritau rua tekau ma tahi i nga rangi tata nei. Hei taa Lincoln Savage, tauira o mua, engari, he kaiako reo Maori ki te Kaareti o Kings inaianei, kua roa te hotaka Te Huarahi Maori e whakangungu ana i nga kaiako o apopo.
Copyright © 2017, UMA Broadcasting Ltd: www.waateanews.com