December 13, 2016
FOMA te mahi tahi ki a Bill English
FOMA te mahi tahi ki a Bill English
E rikarika ana te toihau o FOMA ki te mahi tahi ki te peremia hou, ki a Bill English. Hei taa Traci Houpapa, kua tutaki ia ki a English, kua mahi tahi raua i roto i nga kaupapa a te Kawanatanga, a, hei taana, he tangata ngakau pono, he tangata korero pono a English. Hei taa Houpapa, ko te manako kia tautoko tonu a English i nga kaupapa whakawhanake hapori Maori a FOMA.
Whakatuu whare ki te rawhiti o Tamaki
Kei tetahi taha, ko Ngati Paoa, kei tetahi o Ngati Whatua Whai Rawa. Kua whai waahi raua, otira, nga roopu pakihi e tautoko nei raua, ki te rarangi poto ki te whakatuu i nga whare toru mano ki te ra whiti o Tamaki. Hei taa te tahuhu rangapu o te Tamaki Regeneration Company a John Holyoake, kei te mahi tahi ratou ko Ngati Paoa mei kore e riro i a ratou te kirimana ki te whakatuu i era whare huhua.
Whakakore reiti i runga whenua Maori
Kua tahuri etahi kahika o te motu ki te tautoko i te kaupapa whakakore reiti runga whenua Maori, mena e whakawhanakehia ana taua whenua. Ko te kaupapa nei tetahi o nga wahanga hou o nga panonitanga ki te Ture Whenua Maori. Hei taa etahi kahika, ki te puta he hua i te whenua Maori ki ona kaipupuri, no te hapori whanui katoa te whiwhi.
Te tango onepu mangu i nga takutai moana o Patea
Neke atu i te 17,000 tapaenga whakaaro kua tae atu ki te Ratonga Tiaki Taiao e pa ana ki te hiahia o Trans Tasman Resources ki te tango onepu mangu i nga takutai moana o Patea. Kei te whawhai nga iwi, nga roopu manaaki taiao me nga pakihi hii ika ki tenei hiahia. Hei taa Phil McCabe o te roopu Kiwis Against Seabed Mining, i ngana a Trans Tasman ki te mahi i te mahi nei, e rua tau ki muri, a, i tino whakaheengia i taua wa. Mohoa nei, he kaha ke atu te whakahee.
Te Heamana Hou o Te Mangai Paaho
Koia te mea rangatahi rawa o te Poari o Te Mangai Paho, engari, he hiahia toona kia ata whakaaro te Poari, me pehea taa ratou tautoko i te whakarauoratanga o te reo i waho atu i te pouaka whakaata me te reo irirangi. Ko Eruera Tarena o Ngai Tahu te Heamana hou o Te Mangai Paaho, a, hei taana, ko te ao matihiko tetahi waahi hei titiro ma Te Mangai Paaho.
Piki te uara o Whai Rawa
Kei te huroo a Ngati Whatua Orakei, ina koa, kua piki te uara o te konae whakangao putea a tona ringa pakihi, ara, a Whai Rawa, ma te rua tekau ma rua oorau, ki te waru rau, waru tekau ma ono miriona taara. Hei taa te tahuhu rangapu, a Rob Hutchinson, ko te take i piki ai te uara, na te mea, kua timata a Whai Rawa ki te whakawhanake whenua me te whakatuu whare, katahi ka hokona atu.
Copyright © 2016, UMA Broadcasting Ltd: www.waateanews.com