November 21, 2016
Rahui kohi koura ki Kaikoura
Rahui kohi koura ki Kaikoura
Kei te tautoko Te Runanga o Ngai Tahu i te whakatau a te Minita Ahumahi, a Nathan Guy kia tuu he rahui i runga ki te kohi koura, maataitai me te karengo i te takutai o Kaikoura. Hei taa te kaiwhakahaere o te Runanga o Ngai Tahu a Taa Mark Solomon, kua roa ratou ko te Runanga o Kaikoura e mahi tahi ana kia tika ai taa ratou tiaki i te taiao moana o te takiwaa me ona koiora o roto, a, ko te tumanako, ma tenei rahui ka piki ano te ora o te taiao moana hei paataka kai mo nga uri whakatipu.
Kaiwhakahaere hou mo Whanau Tahi
Kua tohua a Ray Noonan hei kaiwhakahaere i te pakihi Whanau Tahi. Koia tenei ko te pakihi hangarau a te Whanau o Waipareira, me te aha, ko Whanau Tahi tetahi o nga pakihi hangarau, tuuperepere rawa atu nei te tipu, i roto i tenei whenua. Hei taa Noonan, ko te aronga nui o Whanau Tahi, he waihanga hangarau hei awhina i nga whanau Maori ki te hono atu ki nga ratonga paapori, matauranga, whai mahi hoki hei oranga mo ratou.
Tuhi reta nga umanga nui ki te Kawanatanga
Kua tuhi reta tumatanui etahi o nga umanga rongonui o te motu ki te Kawanatanga, e akiaki ana i te Kawanatanga kia kakama taa ratou whakatuu kaupapa hei manaaki i te ahuarangi. Hei taa nga Umanga penei i a Z Energy, Fuji Xerox, the Tindall Foundation, Sanford Fisheries me Ernst and Young, he mea nui te oranga o te taiao ki nga uri o tenei whenua, no reira, e tika ana kia tuu i te Kawanatanga he kaupapa aukati hauhaa kia mimiti iho ai te mahana haeretanga o te ao. Ka hoatu tenei reta ki te Minita i nga take Ahuarangi, ki a Paula Bennett i tenei ra.
Whakahee a Te Ohu Kaimoana
Kei te whakahee Te Ohu Kaimoana i te kaupapa hou a te Kawanatanga e nui ake ai te whai waahi o te hunga hii reehia ki te rangai ika. Hei taa te tahuhu rangapu o Te Ohu Kaimoana a Dion Tuuta, kaore ano te Kawanatnga kia korero ki nga iwi mo tenei kaupapa hou, a, kei te takahi i nga whakaritenga o te ture rawa ika o te tau iwa tekau ma rua.
Tukino tonu nga umanga hinu
Kei te tukino tonu nga umanga hinu i to tatou taiao. Koira taa Marama Davidson o Nga Kakariki. Kua tae atu a Davidson ki Turanga ki te tautoko i nga iwi me nga hapu e whakahee nei i te mahi taunaha hinu a Statoil me Chevron i nga takutai moana o te Tai Ra Whiti. Hei taana, e whai kaha ana nga iwi taketake o te ao ki te whakatumatuma ake ki nga umanga hinu i enei ra, me te aha, e harikoa ana tona ngakau ki tera ahuatanga.
Whakapau putea mo te hunga kore mahi
Mena e hiahia ana tatou kia whai mahi o tatou uri Maori, me whakapau putea, me whakangao putea te Kawanatanga ki te whakawhanake i nga rohe. Koira taa Marama Fox o te RTM. Hei taana, me waihanga rautaki te Kawanatanga e tipu ai te ohanga o nga rohe.
Whiwhi a Taakuta Amanda Black i te Marsden Fund
Kua whai putea a Taakuta Amanda Black o Te Whare Wananga o Waitaha i te Marsden Fund, hei awhina i a ia ki te rangahau, me pehea tatou e aukati ai i te urutomotanga mai o nga kiirearea me nga koiora kino ki konei ki te patu i to tatou taiao, penei i te mate kauri dieback. Ka ata tirotiro ia i nga tikanga Maori me nga tikanga Pakeha, mei kore e kitea he hanumitanga e pakari ake ai ta tatou arai atu i nga kaipatu i to tatou taiao.
Copyright © 2016, UMA Broadcasting Ltd: www.waateanews.com