Standing Rock he rite ki te iwi o Ihumatao

Standing Rock he rite ki te iwi o Ihumatao

Kei te kitea nga ritenga o taa te iwi taketake o Standing Rock whakatumatuma ki te Kawanatanga o Amerika, ki nga pakanga a te iwi Maori ki te Kawanatanga o konei. Koira taa te mangai torangapu mo Manurewa, taa Louisa Wall. E aatete ana te iwi Sioux ki te hiahia o te Kawanatanga o Amerika ki te whakatuu ngongo para hamuti ki to ratou whenua tapu. Hei taa Wall, e rite ana te ngako o taa ratou aatete, ki taa te iwi o Ihumatao i Mangere, e whakahee nei i te hiahia o Fletcher Residential me te Kaunihera o Tamaki ki te whakatuu i te wha rau whare ki runga i to ratou whenua tapu.

Te Karauna me nga hapu e whitu o Ngati Kahungunu

Kua whakaae te Karauna me nga hapu e whitu o Ngati Kahungunu i roto i te rohe o Ahuriri ki etahi whakaritenga e tau ai te kokoraho Tiriti a aua hapuu. Tekau ma iwa ira kati rima miriona taara te rahi o te putea, ko te mana ki te hoko hea i roto i te ngahere o Kaweka, me te whakahokinga o nga whenua taapui o Pakake me Heipipi i Ahuriri ki nga hapu. Ka whakatuuria hoki he roopu hou, ko Te Komiti Muriwai o Te Whanga te ingoa, hei tiaki i te taiao o taua muriwai.

Tohu-a-ao ki a Aroha Campbell

Kua whakawhiwhia a Aroha Campbell o Ngati Tahu Ngati Whaoa, tahuhu rangapu o te Tarahiti o Tauhara Nama Rua, ki tetahi tohu-a-ao mo ana mahi nui i roto i nga kaupapa whakawhanake pungao ngawha i runga whenua Maori. Na te US Geothermal Resources Council a ia i whakawhiwhi ki te tenei tohu, me te aha, koia te wahine Maori tuatahi, otira, te wahine iwi taketake tuatahi o te ao kia korowaitia ki taua tohu.

Nga kaikoohuru a Moko Toheriri

Kei mua ano te hunga i patu i a koohungahunga Moko Toheriri kia mate, i te aroaro o te kooti i te ra nei. Kei te piirahia e David Haerewa raua ko Tania Shailer, te tekau ma whitu tau ki ro whare herehere, i hoatu ki a raua.

Whai te Kawanatanga nga tauira kua haere ki Ahitereiria

E aruarumia ana e te Kawanatanga nga tauira o tenei whenua kua haere atu nei ki Ahitereiria, he putea taurewa whare wananga tonu waa ratou, kua tukuna e te tari taake o Aotearoa, he rarangi ingoa ki te tari taake o Ahitereiria, tekau mano ingoa kei runga. Ko te hiahia o to tatou Kawanatanga kia hoki mai te kotahi piriona taara i aua tauira ra, ki te ohanga o tenei whenua.

Heke te oorau o nga Maori kore mahi

E ai ki nga tatauranga kore mahi o te wa, kua heke te oorau o nga Maori e kore mahi ana, i te tekau ma rua ki te tekau ira kati ono, heoi, ahakoa tera, mo ia tangata kore mahi o tenei whenua, tokorua ke nga Maori e kore mahi ana. Hei taa Marama Fox o te RTM, Mena e hiahia ana tatou kia whai mahi o tatou uri Maori, me whakapau putea, me whakangao putea te Kawanatanga ki te whakawhanake i nga rohe.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Bill a grab for Maori land – Whaitiri Parata slates karanga protest Fish quota model copied for water