October 31, 2016
Whakakorengia e Tuhoronuku te hui o Ngapuhi
Whakakorengia e Tuhoronuku te hui o Ngapuhi
I tona tikanga kia hui a Ngapuhi i te ra nei ki te whiriwhiri i te ara whakamua mo taa ratou tono raupatu, engari, kua whakakorengia e Tuhoronuku te hui. Hei taa Hone Sadler o Tuhoronuku, ko te take, na te mea, kua whakaae te karauna kia kaua Te Kotahitanga o Nga Hapu o Ngapuhi e amine i etahi o nga wahanga o te purongo Maranga Mai, engari ano a Tuhoronuku, me maatua whakaae ki te katoa.
Te Manatu hou ma nga tamariki
Kaore te Kawanatanga i te maharahara ki nga whakahee a era atu roopu torangapu me nga roopu tamariki e hangai puu ana ki te Manatu hou kei te whakatuuria e ratou. Kei te pumau te Kawanatanga ki te ingoa Manatu Tamariki Whakaraerae hei ingoa mo te Manatu, ara, Ministry for Vulnerable Children, engari, kua utaina hoki he ingoa Maori ki te Manatu, ara, ko Oranga Tamariki. Ka noho te Minita Whakahiato Ora, a Anne Tolley hei minita o taua Manatu.
Powhiritia nga taonga a Te Kooti
Kua powhiritia te pukapuka karakia a Te Kooti me taana kotiate hoki ki runga i te marae o Paarou i Manutuke. Kei te haria enei taonga ki te Whare Pupuri Taonga o Te Tai Rawhiti hei raukura mo te whakaaturanga o nga taonga a Rongowhakaata hei te marama o Hakihea. Hei taa te kahika o Turanga, a Meng Foon, ki te whai a Rongowhakaata kia riro ano i a ratou aua taonga a Te Kooti mo ake tonu atu, ka tautoko ia. I tenei wa, kei Te Whare Pupuri Taonga o Te Matau-a-Maui te mana tiaki i te pukapuka karakia a Te Kooti, kei Te Whare Pupuri Taonga o Waitaha te mana pupuri i te kotiate.
Me whakapau putea kia whai mahi
Mena e hiahia ana tatou kia whai mahi o tatou uri Maori, me whakapau putea, me whakangao putea te Kawanatanga ki te whakawhanake i nga rohe. Koira taa Marama Fox o te RTM. Hei taana, me waihanga rautaki te Kawanatanga e tipu ai te ohanga o nga rohe, ma reira ka hua ake he turanga mahi mo o tatou uri.
Nga tatauranga kore mahi hou
Ehara i te mea, me huroo tatou i nga tatauranga kore mahi hou kua puta. Koira taa te Kaunihera o Te Uepu Kaimahi o te motu. E huroo ana te Kawanatanga i te hekenga o te tatauranga kore mahi i te rima ira kati whitu oorau ki te rima ira kati rua oorau. Engari, hei taa Bill Rosenburg o te Kaunihera, kaore tera tatauranga i tatau i te hunga e whakamahi ana i te ipurangi ki te kimi mahi ma ratou. Kaore hoki te Kawanatanga i te whai whakaaro ki te tokomaha o a tatou rangatahi, kaore i te mahi, kaore i te whai tohu matauranga, kaore ranei i roto i nga hotaka whakangungu mahi.
Copyright © 2016, UMA Broadcasting Ltd: www.waateanews.com