Listen Now: 
Hikoi mo te taitokaitanga
Ehara i te mea, kei te mimiti haere te kitea o te taitokaitanga, no reira, me whakatuu kaupapa ano hei patu i tera mahi whakarihariha. Koira taa te mangai mo Te Taitokerau taa Kelvin Davis. Kei te whakahaere hikoi ano ia hei te rua tekau ma toru o tenei marama mo nga ra e whitu ki roto o Kaitaia. Ka hikoi ia i te wha tekau kiromita ia ra. Tuia ki tena hikoi, ka whakahaere a Mike Shaw i te Seven7 Challenge ki Kaikohe, a Anthony Thompson i etahi hikoi ki roto i nga hapori o Ngati Whatua…katoa katoa he kaupapa hei patu i te taitokaitanga.
Te Ture Hararei
Me panoni e te Kawanatanga te Ture Hararei kia whai waahi ai nga whaangai ki te haere ki nga tangihanga o era o te whanau i whangai i a ratou. Koira taa te Uepu Kaimahi E Tu, whai muri iho i te whakatau a te Employment Relations Authority kia kotahi noa iho te ra ki a Awa Minhinnick, he kaimahi ma Rino Aotearoa, kia haere ia ki te tangihanga o tana tuakana whangai o Arnold Kaihau i te marama o Kohitaatea. I tohe a Rino Aotearoa, ehara a Minhinnick i te teina tuturu o Kaihau, no reira, kaore i te pai kia ngaro i te mahi mo te katoa o te tangihanga.
Pirihimana Hou
Kua whakarewahia e Reipa taa ratou kaupapa here mo ture me tika hei kokiri ma ratou ki te kowhiringa pooti a tera tau. Ko te pou o tenei kaupapa here a ratou, ko te kotahi mano pirihimana hou ka taapirihia e ratou ki te Manatu Pirihimana kia tokomaha ake ai nga Pirihimana hei whakatau i nga raru o te wa. Hei te ra nei, ka whakarewahia e Aotearoa Tuatahi taa ratou kaupapa here mo te ture me te tika, a, e ai ki nga korero, ko te ngako o taa ratou kaupapa here, ko te kimi i te kotahi mano, e waru rau pirihimana hou.
1.8 Piriona Taara ta te Kawanatanga.
Kotahi ira kati waru piriona taara te putea toopu a te Kawanatanga i tenei tau putea. Hei taa te Minita i nga take Putea a Bill English, e whiriwhiri ana te Kawanatanga me pehea taa ratou whakapau i taua putea, engari, ko tetahi whakaaro nui kia tapahia nga taake i mua i te kowhiringa pooti a tera tau. Hei taa te Mangai Take Putea o Reipa, a Grant Robertson, e tika ke ana kia whakapau te Kawanatanga o Nahinara i taua putea toopu ki nga Ratonga Paapori, otira, ki nga kaupapa pera i te kainga koretanga me te tuakokatanga tamariki.
Te kainga koretanga
E karanga ana a Reipa ki te Kawanatanga kia noho ki te tepu kotahi ki te whiriwhiri i taa ratou ko Nga Kakariki, ko te RTM purongo e pa ana ki te kainga koretanga. Hei taa te mangai take whare o Reipa, a Phil Twyford, ko tona wha mano rua rau taangata e kainga kore ana. E whakahau ana ratou ko Nga Kakariki, ko te RTM kia whai te Kawanatanga i te Canadian Housing First model, , he kaupapa e kimihia ai he whare mo te hunga kainga kore, katahi ka karapotihia ratou ki nga ratonga paapori kia kore ai ratou e kainga kore ano. I tua atu i tena, e mea ana a Reipa, Nga Kakariki me te RTM, me maha ake nga whare kawanatanga, me whakatuu i etahi atu whare utu mama, me tino tautoko i te kaupapa Kainga Whenua.
Kanohi hou mo Ngati Kahungunu Asset Holding Company
Tokorua nga kanohi hou kua whakauungia e Ngati Kahungunu Iwi Incorporated ki to ratou poari pakihi, ara, ko Pania Tyson-Nathan, tahuhu rangapu o Taapoi Maori Aotearoa, raua ko Heather Te Au-Skipworth, kaiwhakahaere i a Iron Maori. Ko Hayden Hape, Trevor Moeke, Paora Ammunson, Taine Randall me Rangi Manuel era atu mangai o te Poari Pakihi nei, e kiia nei ko te Kahungunu Asset Holding Company.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2016, UMA Broadcasting Ltd: www.waateanews.com
