Listen Now: 
Ko wai ka mohio ki nga maauiuitanga e tau mai nei ki te whakamatemate raakau?
Kua tae atu te mate patu kauri ki te ngahere o Warawara, rohe o Hokianga ki te raki.
Kua whakatuuturuhia e nga kaipuutaiao te taunga o taua mate ki reira ahakoa te takanga o te paitini 1080 me te huringa ki te taawhiti paihamu, taawhiti kiore.
E meingatia ana ko taua ngahere te kaipupuri o te wairua o Te Raarawa.
Kohi puutea
Ko tenei te marama kohikohi puutea mo te Whare Whakaruruhau Waahine.
Ahakoa nga uauatanga puutea kaahore nga kaiwhakahaere e piirangi ana ki te kati i etahi o nga whare.
Hai taa ratou ano he mea tino nui kia whai aahuru moowai nga waahine e tuukinotia ai me a ratou tamariki.
Hootaka whaaiti hou (app)
Kua tukua mai e kamupene haangarau a Kiwa Digital he hootaka whaaiti araa he app i hangaia hai aawhina i nga aakonga turi araa ko nga Maori.
Ko Ruaumoko te iingoa o te hootaka he pukapuka matihiko me te whakamahinga o etahi o nga korero tuku iho a o tatou tuupuna.
E mea ana te toihau o Kiwa a Steven Renata ka whakamoohio atu ki nga tauira turi o ratou whakapapa me etahi korero mo nga Atua Maori.
Whare taretare kaua e kahakina
Kaua e kahakina te Whare a iwi o Te Urewera i Waikaremoana taa te mea he taonga.
Koia te karanga a Vern Winitana maangai korero o Ngati Ruapani mo taua whare na kaiwhakahoahoa Maori a John Scott o Ngati Kahungunu i tauira.
Hai taa Winitana i waihotia te whare e te Papa Atawhai kia puuwhaawhaa. Kua noohia te whare raa e Ngati Ruapani.
Whareherehere ako
He aha i whakaako ai nga kaupapa mo te oranga o te tangata ki nga whare herehere?
Koia te paatai a te Minita Whakatika Tangata a Judith Collins me tana hiahia kia tirohia te take i kuhu atu ai a kaiako Ngapari Nui ki te mahi i taua mahi aawhina i te whare herehere o Whanganui.
Hai taa Debbie Packer o Ngati Ruanui i whakaritea a Ngaapari ki taua mahi whakaako kaare he take o te whakatau a te tari ki te aukati i a ia me ana mahi na te mea he mema keenge.
Copyright © 2016, UMA Broadcasting Ltd: www.waateanews.com
RELATED NEWS
