Listen Now: 
He whakaaturanga o te tikanga motuhake o te maanakitanga.
Koia te korero a Minita Maori a Te Ururoa Flavell e whakamihi ana ki te marae o Te Puea i Taamaki Makaurau e tautoko ana i nga taangata kaaingakore.
Heoi ano e kii ana a Flavell, ko te mahi a Te Puea kei te whakaatu hoki i nga koohao ki nga puunaha tiaki taangata.
A te waa hai taana ano, ka whakakapi a Whaanau Ora i aua koohao kaahore e kapia nei e nga tari kaawana.
Rei hoonore
He hoonore nui me te harikoa o te ngaakau.
Kua whakawhiwhia ki te tohu taa a Matiu Rei o Ngati Toa Rangatira mo aana mahi ki te arataki i tona iwi.
Hai taana ano he mea tino nui ki a ia ko te aarahi i te whawhai mo te takutai moana.
Kaati kua tukua ki a Rei taua hoonore i te raarangi o nga tohu a te Kuini o Ingarangi i tana huritau 90.
Mahi a rehe
Tokomaha nga tauria mahi a rehe a te Tarahiti Maori, e kiia nei He Toki Apprenticeship Trust kua riro i nga kaituku mahi o Waitaha.
Hai taa kaiwhakahaere a Heemi Inia, tekau neke atu nga roopu e hiahia ana ki nga tauira rangatahi Maori o te rohe.
I whakatuuria te Tarahiti no te ruu i Otautahi kia whakaako i nga puukenga a rehe ki nga taiohi Maori.
Taonga hokohoko
Kua puta he taonga whakairo i Wiiwii whenua hai hokona atu ki tetahi maakete tauhokohoko akuanei.
E meingatia ana he mutu kaakaa i whakairohia e te tohunga rua rau tau ki muri.
E whakapae ana ka hokona mo te utu nui tata ki te rima rau mano taara pea.
Ki nga korero o te waa ka nui te hiahia o te hunga kohikohi taonga ki nga ohaoha Maori.
Kua puta pea te ihu o Clinton
Kua whakatuuturuhia e Hillary Clinton tana tuu hai wahine tuatahi ki te aarahi i nga Democrats ki te koowhiringa pooti o Amerika.
Kua karo a Clinton i te wero nui a Bernie Sanders ki te whakaputa i tona ihu.
Heoi ano e mea ana a Sanders, ma te tautoko o nga rangatira o te Paati anake ka tuu toa a Clinton.
Ka mohio ki te whakaaro o aua rangatira a te hui nui o nga Democrats a tera marama.
Kua mate a Taa Kereama
Kua hinga te tootara o te wao nui a Taane araa ko Taa Graham Latimer tera o Te Paatu me Ngati Kahu, 90 tau ona tau.
Naana tana paamu i hoko i te tau 87 kia whawhai atu ki te Karauna mo te hokona atu o nga rawa o te motu araa state owned assets.
Atu i tera he tiamana waa roa a Taa Kereama o te Kaunihera Maori me te Tarahiti Reeti Ngahere Karauna.
Kaore ano nga whakaritenga mo te tangihanga o te kaumaatua raa kia puta, heoi ano, e te rangatira takoto mai moe mai raa.
Copyright © 2016, UMA Broadcasting Ltd: www.waateanews.com
RELATED NEWS
