August 17, 2015
He tohu whakatiketike.
He tohu whakatiketike.
I te raa nei kua huraina he pakoko rauwhero o Kiingi Taawhiao te kiingi tuarua i te Whare Pupuri Taonga o Waikato.
Ko Gary Schofield o Aotearoa te kaitoi naana te pakoko raa i hanga.
Kua mahi tahi te Kaunihera o Kirikiriroa ki te Kiingitanga ki te whakarite i te huranga o te mahi i whakairohia toru tekau tau ki muri.
Hai taa Julie Hardaker koromatua o Kirikiriroa he rangatira nui a Taawhiao i ona raa i runga i tona kaha ki te whakakotahi i nga hapuu o Waikato.
Awhinatia te hunga kore whare.
Apopo ka whakarewa i tetahi hootaka kia noho ai nga whaanau ki nga whare pai te utu, pai te hauora.
E mea ana nga kaiwhakahaere o te roopu e aarai nei i te rawakoretanga o nga whaanau me a ratou tamariki ahakoa nga kii taurangi me nga rautaki a te kaawana ka kite tonu i nga raruraru noho whare i Aotearoa.
Hai taa ratou ano me whakamaamaa i nga tikanga a utu, a penihana mo nga whaanau poohara ma reira ka ahei ai ratou ki te noho ki nga whare kia pai te hauora o te whaanau katoa.
Nga tuuranga mahi.
He wehi no Waikato Tainui kei ngaro te maha o nga tuuranga mahi i to ratou rohe na reira kua huri te iwi ki te korero ki nga kamupene pera i a Solid Energy me etahi atu.
Ko te hiahia kia kite me pehea e whakamarumaru i nga whaanau pena whakangaro atu i nga tuuranga hai te roanga o te waa.
Hai taa Raahui Papa ko tetahi o nga rangatira o te iwi me whakaheke i nga paanga kikino koia te whakaaro nui o te waa.
Poroteehi TPPA
Kua tuu te haapori ki te korero mo te kirimana tauhokohoko o te ao o te TPPA.
250 taangata kua kaha whakahee i te ahua o taua whakaaetanga i Kaitaia.
Hai taa kaiwhakahaere Reuben Porter he kitenga ohorere ki a ia te tatuunga o te tokomaha o nga Paakeha ki tera kaupapa whakahee.
Hai taa Porter ano i tuu ko etahi taakuta ki te korero mo te hanga whawhati tata o te kirimana raka ki te oranga o te motu me te piki haere o nga utu ki nga rongoaa hauora mehemea ka uru atu a Aotearoa ki te tautoko i te TPPA.
Copyright © 2015, UMA Broadcasting Ltd: www.waateanews.com