Listen Now: 
Tainui 20 tau.
Kua tata ki te rua tekau tau pahure atu nei no te whakataunga o te kaupapa Tiriti o Waitangi a Waikato Tainui ki te Karauna.
No reira ka tuu te iwi whaanui ki te maumahara i taua waa motuhake me etahi whakaritenga motuhake.
A te Raatapu ka hura i tetahi pou haki hou ki Hopuhopu kaatahi ka whakarewa ookawa i te kaupapa hai whakanui i te whakataunga o te take raupatu, rua tekau tau ki muri.
Ka mutu ka waatea nga whakaritenga nei ki te katoa.
Kii tonu nga whare.
He whare kii tonu i te tangata, ka rongo i nga paanga.
Koia te korero mo te rua tekau paiheenti o o tatou whare otiraa o te Maori pera ano nga whare o te hunga Pasifika.
Mehemea ki te titiro ki nga whare i te rohe o Manukau rua tekau maa rua paiheeneti o nga whare o te tangata, he whare oopuru.
Kaati ki nga rangahau o te waa ka tuuwhera nga kainoho o aua whare ki nga maauiuitanga araa ki te ruumaatiki, ki nga urutaa kiri,ki nga mate whakangaa.
Heoi ano koia ano ko tetahi o te raarangi o nga rangahau kei te taautu i nga raruraru o nga whare kiikii.
Haumaru wai.
E whakatata mai ana te raumati aa kua whakatairanga a Haumaru Wai Aotearoa i taa ratou karere ki te Maori kia mataara tatou ki taatahi, ina paa atu ranei ki te wai.
Hai taa te roopu haumaru nei kua whakatuuria he hootaka hou "Kia Maanu, Kia Ora" te iingoa e arotahi nei ki te oranga o nga rangatahi na te mea ko nga taioha kei te tino tuuwhera ki te toremi, e ai ki nga tatauranga.
Ka mutu 22 paiheeneti o nga toremi katoa i tera tau he Maori.
Te kooriporipo o te taniwha?
He taniwha i kitea ki te whanga o Oke rohe o Peiwhairangi i te Taitokerau he aha ranei?
I whakaahuahia te kooriporipo o tetahi kaiora nui kaahore e mohio ana ki tona aahua tuuturu.
I hopukia taua ahua i runga i te waahi ipurangi o google earth ko etahi e kii ana he taniwha pea tera engari ki taa etahi kaipuutaiao ko te kooriporipo kee tera o tetahi kaipuke iti.
Whenua maroke.
E whiitiki ana nga paamu ki etahi rohe mo te kino o te maroke i tenei raumati.
Ko Waitaha i te Waipounamu tetahi takiwaa kua rongo kee i te maroke o nga raa aa kei te kite hoki i te maroke o te one.
E mea ana te tari huarere ko te hiahia o Waitaha kia heke te ua mo nga wiki e toru neke atu ranei te roa kia tau ai nga paanga o te maroke.
Ka mutu kei te maroke hoki etahi waahanga o te Ika a Maaui araa ki te raki o Taupo, ki te raawhiti o Opotiki, ki te tonga o Kaawhia.
Ma te reo.
Akuanei ka tohaina puutea mo te whakahaeretanga o te hootaka Ma Te Reo.
Waru tekau maa rima nga kaitono ka whiwhi puutea mo te tau hou.
Hai taa kaiwhakahaere Taakuta Poia Rewi ka akiaki i nga tono taumata tiketike aa e rikarika ana ia me te roopu tohatoha puutea ki te tautoko i nga hootaka rerenga kee.
Copyright © 2014, UMA Broadcasting Ltd: www.waateanews.com
RELATED NEWS
