Listen Now: 
Hokohoko whare
He mea nui ki nga iwi katoa te whakatuu whare mo nga uri.
Koia te korero a Tukoroirangi Morgan tetahi o nga rangatira o Waikato Tainui aa ma te iwi e whiriwhiri i nga whare a te tari whare e pai ana kia hokona mo te iwi.
Hai taa Morgan kaore ano kia whakaritea taa ratou mahere tauwhaaiti e paa ana ki te hokona o nga whare.
Ki a ia ko te wero mo nga iwi kia tuutaki i nga wawata noho whare hei te roanga o te waa.
Kaunihera Whakaruruhau
Ko te whakaritenga o Aotearoa ki te Kaunihera Whakaruru o te Kaahui o te Ao he toa mo nga whenua iti.
Hai taa John Key kua roa a Aotearoa e whakapau kaha ana ki te haapai i taa tatou tono me te whakapono ka taea te aawhina i te tuunga o tenei ao kia pai ake te ahua.
I whai waahi hoki a Aotearoa ki te Kaunihera Whakaruruhau i te tau 93 mo nga tau e rua.
Whakamomori rangahau.
Me korero, me rapu rongoaa ma reira ka whakaheke i te maha o tatou e whakamate ano i a tatou.
Hai taa kairangahau Ana Sokratov he nui te puutea ka waatea mo nga haapori ki te aarai i te whakamomori ki roto i a ratou. Hai taana ano me tuku tono nga haapori Maori
kia whakahaere hootaka aawhina ki o ratou takiwaa.
Koni atu i tera ko te aroha te mea nui ake tae noa ki te whakawhitinga o te korero.
Nga korero mo te waimaori
Ko te painga, ko te huanga o te wai, ko te whakahaeretanga o te wai, ko te tohanga o te wai.
Hai taa Willie Te Aho maangai korero o te Kaahui Maori Tirotiro i nga Kaupapa Waimaori koia nga kaupapa nunui kei te tirohia kei te rangahaua i tenei waa.
Ki a ia e kore te Maori e nohopuku engari ka whai waahi ki nga whakaritenga katoa mo te wai.
Ka hari te roopu waimaori nei i a ratou kohinga korero ki te hui mo nga rangatira a iwi ki Tauranga a tera marama.
Rutu pooharatanga
He mea nui kia rutu i te noho rawa kore a te iwi.
Koia te tirohanga a Te Ururoa Flavell Minita Whakatupu i te Maori me tana kii he hookai whakamua te whakaritenga wawe o nga taakuta kore utu ki nga tamariki o Te Taitokerau.
E mea ana a Flavell ko te utu hauora tetahi kaupapa i whakaarahia e te Paati Maoriaa kua tiimata te kitenga o nga hua.
Ka mahi tahi mo te oranga taiao
E uu ana te mana whenua o Tauranga Moana ki to ratou hiahia kia whakahaere ngaatahi i nga kaupapa taiao i to ratou rohe whaanui.
Hai taa Awanuiaarangi Black o te iwi kaainga kua whakapuare te kaunihera i to ratou whakaaro ki nga iwi araa kia mahi ngaatahi.
Hai taa Black ano kei te kite hoki i te wawata o nga kaiwhakahaere Paakeha ki roto o kaunihera ki te aro ki nga tirohanga a te Maori me a tatou tikanga.
Copyright © 2014, UMA Broadcasting Ltd: www.waateanews.com
RELATED NEWS
