Listen Now: 
Te wiki huangoo.
Kaua e waiho kia kino ake, kia maauiui ake te tinana.
Koia te korero i tenei waa ko te wiki hai whakaara ake i nga kaupapa huangoo.
E mea ana te roopu huangoo o Aotearoa 52 taangata ka mate ia tau na runga i nga paanga o taua mate me te kii he taimaha ake nga paanga o te huangoo ki a tatou te Maori.
Kaati, koia ka aro ki nga tikanga mo te aaraitanga o te huangoo me te rapu puutea kia kaha ake nga rangahau o te waa.
Maungatupuna ka tikina.
Kua tohungia nga kaipupuri whenua Maori o Maungatautari i Waikato
e kore e taea te aukati i te mahi a tetahi roopu Paakeha hai aarahi tuuruhi ki runga i taua maunga.
Heoi ano e kii ana te Kooti Whenua Maori mehemea ka aarahi tuuruhi me aarahi kore utu i a ratou.
Ahatia nga korero e mea ana a Linda Te Aho roia o Ngati Koroki Kahukura me aronui ki te haa o te maunga ka tika maana nga taha katoa e tiaki.
He torutoru nga Ratonga
He iti nga ratonga mo nga rangatahi Maori mate wairangi i enei raa.
Koia te tirohanga a nga kaimahi tautoko tuuroro huri noa me te kii he uaua ki te whakarato i te aawhina tika ki te katoa.
E mea ana te korero kei te heke haere te maha o nga iwi atu i te Maori e whakamatemate i a ratou ano engari tokomaha tonu nga Maori e huri ai ki te whakamomori.
Na reira kei te hui tahi nga tohunga kaupapa mate wairangi ki Otepoti i tenei wiki ki te whakarite puurongo hai whakatakotoranga ma ratou akuanei.
Te huringa tai…kaahore.
Kei te hee te whakapae a etahi ki te huringa maarika o nga kaipooti Maori ki a Reipa.
Koia te korero a Hone Harawira rangatira o te roopu Mana i te waa e maatakitaki ana i nga tautohetohe ki roto i a Reipa.
E tautoko ana a Harawira i te tono a Nanaia Mahuta mo te rangatiratanga o tana roopu ahatia hai taana ano ko nga mahinga i tenei waa a Reipa penei me te waka pakaru te ahua.
UN Aotearoa?
Hei apopo ka pooti nga whenua o te ao ki te whakakii i nga tuuranga e rima ki runga i te Kaunihera Whakaruruhau ki te Kaahui o te Ao.
E whakapau mahara ana a John Key Piriimia o Aotearoa ka riro ma tatou tetahi o aua tuuru motuhake.
Ko te kaunihera tera te mana nui o nga roopu katoa i te Kaahui o te Ao mehemea ka whakaae nga mema 15 katoa o te Kaunihera Whakaruruhau ki tetahi kaupapa ka herea te ao whaanui ki taa ratou e whakatau ai.
Tiaki Puutea
Ko te wiki e kiia nei ko te wiki puutea aa ko te oranga a puutea te arotahi.
E mea ana te Koomihana Whakatairanga Mohiotanga Puutea ko te wero kia whakapakepake i nga whaanau ki te penapena i te puutea hai oranga mo ratou.
Kaati e kii ana nga kaitohutohu puutea me huri te whakaaro atu i te whakapau puutea ki te penapena mo muri atu.
Copyright © 2014, UMA Broadcasting Ltd: www.waateanews.com
RELATED NEWS
