Listen Now: 
Ture whenua kua arotakengia.
Me whakahou i te Ture Whenua Maori ranei pea?
Kua arotakengia taua ture e tetahi roopu motuhake hai taa ratou e tika ana kia whakaheke te mana o te kooti me whakapiki ranei i te mana o nga kaipupuri whenua ki te whai whakatau mo nga whenua Maori.
Kaatahi ano a Te Puni Kookiri raaua ko te Kaahui o nga Rangatira a Iwi ka whakahaere i te rauna tuatahi o nga hui moohiohio mo te anga whakamua o taa ratou tuhinga i tetahi ture hou.
Nga manuhiri tuuaarangi
Ka tatuu nga maangai kaawanatanga o nga whenua 28 ki Turangawaewae apopo ma te Kiingi Maori ratou e manaaki.
I tenei raa ka tae atu nga roopu toorangapuu ki reira kia kitea ai ratou a kanohi i te Koroneihana.
Hai taa Tukoroirangi Morgan maangai o te Kiingitanga ko nga roopu takawaenga ki ro kaawanatanga te arotahi i tenei tau ma reira ka huaki kuaha ki nga huarahi tauhokohoko.
Kaati neke atu i te 30 mano taangata e matapaetia ana ki te Koroneihana i te roanga o te wiki.
Hai aha i te tuuhura hinu
Horekau he tautoko i te Taitokerau mo te keri hinu atu i te aakau o Kaitaia.
Hai taa Mike Smith o Ngati Kahu kua whiwhi raihana te kamupene o Statoil ki te koowiriwiri i te takere o te moana engari kaore ano ratou kia whiwhi i te whakaaetanga o nga iwi.
E mea ana a Smtih ko nga take tuuruhi te huarahi pai ake ki te hanga i nga tuuranga mahi me tana whakapae kei tuukinotia te taiao e nga mahi hinu pera i te rohe o Tauranga i te tau 2011.
He huarahi paruparu te toorangapuu
He paru ake nga take toorangapuu i enei raa koia te paatai a etahi kaiwetewete i runga i kaha o nga roopu ki te whiu i a ratou tao kupu hai a mua i te koowhiringa pooti ae he paru te ahua o te wai toorangapuu.
Ko etahi e kii ana ehara i te mea he mahi hou ko te hiahia o tetahi kaitoorangapuu ki te takahi i te mana o tetahi atu.
Hai taa kaitaatari Chris Trotter ahatia nga korero kei te whiua kia mahara tatou ki nga tukanga tika o te rangimaarie i nga huarahi o te toorangapuu ki Aotearoa.
Mana, kua whiriwhiri taangata.
Kua whakatuuturuhia e te roopu Mana te raarangi o o ratou taangata mo te koowhiringa pooti.
Te mea kee kaahore he tangata i whiriwhirihia ki te rohe Maori o te Taihauaauru.
E mea ana a Georgina Beyer o te Tai tonga raaua ko Kereama Pene o Taamaki Makaurau e kore raaua e tuu ki te raarangi o te roopu Mana .ka whakataetae kee mo te pooti a rohe.
Kaati kei te raarangi o te roopu ko nga taangata o Mana me te paati ipurangi e hanumi ana, e hiikoi tahi ana.
Nga kanohi Maori ka kitea.
Ka kaha rawa atu te raarangi o nga kanohi Maori ki roto o Aotearoa Tuatahi.
Koia te kupu taurangi a Winston Peters rangatira o te roopu raa me te mohio e whakatika ana ratou ki te whakarewa ookawa i taa ratou kaupapa pooti.
Ka hoki a Pita Paraone mema paaremata o mua ki te mura o te ahi aa e maaia ana a Peters ka whai waahi a Paraone ki paaremata.
Copyright © 2014, UMA Broadcasting Ltd
RELATED NEWS
