December 02, 2013
Tautokohia te kaupapa
Tautokohia te kaupapa
Auee te koretake o te whakatau kia kaua e tuku puutea mo te whakatuuranga o tetahi waananga taarai waka i te Taitokerau.
Hai taa Shane Jones o Reipa ko tohunga whakatere waka a Hekenukumai Busby te kaihautuu o tera kaupapa he kaupapa whai hua kia whakaako nga puukenga huhua ki nga whakatupuranga.
Hai taa Jones horekau he raruraru kia takoha e hia kee miriona taara ki a Tima Niu Tiireni he kaupapa kee tera e kore e rite ki taa Hekenukumai.
Ngati Whakahemo
He wehi no tetahi iwi o te Moana a Toi kei riro ano to ratou whenua.
Ko Ngati Whakahemo tera paatata atu ki Pukehina aa ka nui to ratou whakahaarangi ki te whakatau a te Karauna ki te huaki i te kuaha ki a raawaho ahakoa te taapae a taua iwi ki te hoko i te whenua e tautohetia nei mo te utu maakete.
Hai taa Mita Ririnui tiamana o te Runanga o Ngati Whakahemo he whenua tera i taahaengia na reira ka hau atu ratou ki te Kooti ma ratou te hokona atu o tera whenua e aukati.
Whakapaa atu ki te ipurangi.
He mea nui kia whakapiri atu o tatou marae ki nga haangarau o te ao hurihuri ko te ipurangi te mea tuatahi.
Koia te kupu whakahauhau a Te Ururoa Flavell rangatira takirua o te Roopu Torangapu Maori.
Tino whakahee a Flavell me tana roopu i te whakaaro o te Kaawanatanga ki te aarai i te whakahekenga o te utu mo te ipurangi i tohungia e te Koomihana Oohanga.
Hai taa Flavell ano kaahore e pai ana kia tahuri ai te Kaawanatanga ki te whakaora i te rahi i te waa tonu e huri tuaraa ana ki nga hiahia o te iti.
Nga Pungarehu
Kei hea te waahi tika hai marara atu i nga pungarehu o nga whanaunga kua mate.
Ka arotake te Koomihana Ture i nga tikanga e paa ana ki nga tangihanga me nga nehu.
He aawangawanga no etahi ki nga tikanga e whaaia nei e te motu pera i te whiuwhiu i nga pungarehu o te hunga mate ki nga wai, ki te moana, ki hea ranei.
Hai taa te Kaawanatanga tera pea ka whai waahi te Kooti Whenua Maori ki nga whakatau e karapoti ana i te nehu tuupaapaku.
Moohiohio tatauranga
I te raa nei ka tukua mai nga raraunga tatauranga e haangai ana ki te Maori me te motu whaanui.
Ka puta mai nga korero mo nga tikanga nohonoho a te tangata, te maha o te tangata, te ahua o nga iwi me te tini atu o nga moohiohio i kohikohia i roto i nga tau.
E meingatia ana he nui nga korero ka taangia hai whakaatu mai i te ahua o te Maori i enei raa.
Kaakahu whakaruruhau
Ehara ma te mau koti whakaora ki runga i te moana ka heke te kaute o nga toremi.
Koia te amuamu a nga kaipupuri kaipuke iti ki te whakaaro o te Kaunihera o Taamaki kia mau koti te katoa ahakoa pehea te rahi o te poti, o te kaipuke.
Ko nga karapu poti nga roopu kei te kaha aatete i taua whakaaro. Kaati kei te aata matapaki te Kaunihera i nga tikanga haumaru i te moana i te raa nei.
Copyright © 2013, UMA Broadcasting Ltd