Listen Now: 
He korero tipatipa mo Te Roroa.
Kua mauheretia a Allan Titford te tangata naana i whiu whakapae ki a Te Roroa o te Taitokerau.
Ka haere ia ki te whare herehere mo nga tau 24 he tuukino, he paawhera waahine, he tutuu kaapura ona hara.
Rua tekau tau ki muri i karanga mai a Titford i weraina tona whare e Te Roroa engari kei te kii a kaiwhakawaa Duncan Harvey o te Kooti a Rohe o Whaangarei na Titford kee tona ake whare i tahu.
Heoi ano hai taa Harvey ano kua tae ki te waa kia rongo te motu ko wai i hara.
He taonga
Kua tuu ake te Minita Take Maori a Pita Sharples ki te kaha whakahee i te whakatau kia mahue ki tahaki te Maori i te tohanga o te ara tuuatea 4G.
Hai taa Sharples e tika ana me homai ki te Maori tetahi waahanga o tera taonga i te mea he taonga te ara tuuaatea, pera i te wai, pera i te takutai moana.
Hai taa Amy Adams o te Kaawanatanga horekau he paanga o te Maori ki tera ahuatanga.
Kua huri te tai?
Ki nga korero te waa ka rorotu te titiro whakamua mo te taha ki te whai mahi e mea ana te whare puutea o te ANZ kei te piki haere te maha o nga tuuranga mahi i Aotearoa.
Ki nga kitenga i tenei waa e rere whakarunga ana te kaute o nga tuuranga hou e whakatairangatia ana ki nga niupepa, ki te ipuranga, ki hea ranei.
E pai ake ana te kaute i nga taone nunui ka piki, ka heke te rahi o nga tuuranga i nga rohe taiwhenua.
Pire Whakaata Maori kua tautokohia.
Kua whakaaetia tetahi pire i roto o Paaremata kia rite pai ai a Whakaata Maori ki te whakawhiti atu ki te pourewa rorohiko araa digital platform.
Te tikanga kia tohatoha nga raihana ara tuuaatea mo nga tau 20 e tuu mai nei.
Hai taa Pita Sharples Minita Take Maori ma taua tikanga ka uu te Maori ki to tatou tuuranga hai kaitiaki o to tatou ake ratonga pouaka whakaata.
Kua tuu a whai rawa ki te whakahee.
Ehara i te mea ko te Maori raaua ko Greenpeace anake e whakahee ana i te kerikeri hinu ki te moana paatata atu ki Whaingaroa.
Kua tuu hoki a whai rawa Gareth Morgan e mau ana i a ia ko tana pootae whakaruruhau taiao me te paatai he aha te Kaawanatanga i huna ai nga whakaritenga e paa ana ki a kamupene Anadarko.
Hai taa Morgan ano he tohu tera kaore te Kaawantanga e taea to ratou tuuranga mo te keri hinu te wawao.
Kaati e kii ana a Morgan me etahi atu kaua e whakamooreatia te moana me te taiao whaanui mo te moni noa iho te take.
He tohu ora
I whakaaturia nga mahi a nga tuupuna i te whakamaharatanga o te pakanga nui i Rangiriri 150 tau ki muri.
Ko te haka me te peruperu etahi o aua mahi hai taa Brad Totorewa o Ngati Naho e tika ana me whakaako era ahuatanga ki te hunga rangatahi aa me whakamahara i a ratou kiihai o ratou tuupuna i hinga ahakoa nga taimahatanga o te pakanga.
Copyright © 2013, UMA Broadcasting Ltd
RELATED NEWS
