November 18, 2013
Ruataniwha he hootaka tautohenga
Ruataniwha he hootaka tautohenga
Kua werohia te Kaunihera o te Matau a Maaui e paa ana ki te ahua o to ratou paanga ki te Maori kia korerohia te hootaka hanga paapuni i Ruataniwha.
Kei raro i te ture whakahaere rawa e tika ana me korero nga Kaunihera ki te iwi kaainga engari ko taa te Kaunihera o te Matau aa Maaui he korero noa iho ki nga roopu paatata ki te takiwaa o te paapuni kiihai i korero ki a Ngati Kahungunu.
Kaati he aawangawanga no Kahungunu kei paruparu te wai i te awa o Tukituki ma te whakatuuranga o te paapuni.
He raruraru te tuukino
E rongo ana te haapori katoa i nga paanga o te tuukinotanga.
Koia tetahi o nga karere e korerohia nei i tenei wiki ko te wiki o te hootaka riipene maa.
E haere ana a kaitohutohu take kauhungatanga a Takurua Taawera ma runga motupaika huri noa te Ika a Maaui ki te whakatairanga i te kaupapa.
Hai taana kua huri te aro ki te tautoko i nga patunga, ki te whakatupu hoki i nga taangata ki te whakatauira i nga mahi papai.
Ka tuu ki Rangiriri
E matapae ana ka nui te tini o nga tangata e hau atu ki Rangiriri apopo ki te whakamahara i te pakanga i reira 150 tau ki muri.
Hai taa Moko Tauariki o Ngati Naho ka whai waahi nga uri Paakeha mai, Maori mai ki te maumahara i o ratou tuupuna i hinga i te wera o te riri.
Ki a ia ano me mohio nga uri ki nga nawe e mau tonu ana i te whakaekenga o te Karauna ki tera whenua.
Te mate kirikaa
Na te kikii o nga whare te take i kitea whaanuitia te mate kirikaa ki nga haapori Maori.
E ai ki nga korero ko te tonga o Taamaki Makaurau te waahi paakino ake.
Kei te whakahaere te Kaahui Hauora o te Motu i taa ratou hootaka whakamaatautau ki nga kura 61 i nga takiwaa kei reira nga whaanau e tuuwhera ana ki te mate kirikaa.
Hai taa Taakuta Raawiri Jansen kaiwhakarite hauora ehara i te mea ko te whakapapa o te tangata te puna o te raruraru ko nga whare kikii kee te mate.
Te rewharewha
Ehara i te mea e kino ana te rewharewha i Aotearoa i tenei tau engari kua paakinotia te Maori koia tonu te korero a nga kaiwetewete take hauora.
E kii ana a Nikki Turner kaihautuu o te roopu aarai maauiui ko te hunga noho tuuwhera kei te patua tonutia.
Hai taana ano ko nga whare poohara te hanga, te oopuru o nga whare me nga kai kikino e kitea whaanuitia ana ki nga haapori Maori.
He toihau hou
Kua whakaritea he toihau hou mo te Kaunihera a Rohe o Waikato te tangata hai poipoi i nga honohononga hou ki nga iwi whai paanga ki te awa.
Ko Vaughan Payne tera o Ngai Tai me Whakatohea kei te whakakii i taua tuuranga nui.
Hai taa Nanaia Mahuta mema Maori o Hauraki Waikato kua kaha te Kaunihera raa ki te toro i tana ringa ki a tatou te Maori e tupu haere ana taua mahi.
Copyright © 2013, UMA Broadcasting Ltd