Listen Now: 
Kiihai oku maunga i takohatia.
E koa ana a Taa Tumu Te Heuheu ariki o Ngati Tuuwharetoa kua kitea e te Taraipiunara o Waitangi ehara i te mea i hoatu ki te Karauna nga maunga tupua i te puku o te ika ma te Karauna e tiaki, e whakahaere.
E kii ana a Te Heuheu e tika ana me noho tahi a Tuuwharetoa me te Karauna ki te tuuhura me pehea e whakatinana ai te hiahia o tana tupuna o Horonuku kia mahi ngaatahi nga taha e rua ki te whakaruruhau i te rohe whaanui o Tongariro.
He kino te ahua o te whenua me ona taangata.
E tere piki ana te maha o te hunga mate i te whenua o te Phillipines whai muri te huripari nui.
E whakapae ana te Kaahui o te Ao ko wai ka mohio ki te tatauranga whakamutunga o nga mate.
Ki nga korero o te waa ka nui te tini o nga tuupaapaku e raurohatia ana ki te papa o te whenua he aituaa te korero.
E taetae ana te tautoko a te ao ki reira ko te kai, ko te wai, ko nga rongoaa nga mea nunui e piirangtia ana e te haukaainga.
Ka whai hua te Maori?
E kaarangirangi ana a Taariana Tuuria ki te hiahia o Aotearoa ki tetahi tuuru i te roopu whakaruruhau o te Kaahui o te Ao.
Kua roa a Aotearoa e kookiri ana i taua wawata ko Reipa tetahi roopu e kii ana mehemea ki te tatuu tatou ki reira ka piki te mana o tenei whenua.
Heoi ano hai taa Tuuria kaahore ia e kite ana i nga painga mo tatou te Maori na te mea ka whai a Aotearoa i taa nga whenua nui e pai ai, e kore ranei tatou e hiikoi to tatou ake huarahi.
Kia kotahi te Kaunihera
Kua karanga mai te Koomihana Kaunihera o te Motu i tona hiahia ki te whakakotahi i nga Kaunihera e whaa o te Taitokerau kia kotahi ai te roopu whakahaere, ko te Northland Council tana iingoa hou.
Te tikanga kia whiriwhiri hoki nga poari Maori e rua ma nga iwi me nga kaikaunihera e tiipako ko wai maa nga mema.
Heoi ano he whakaaro noa iho tera aa e waatea ana te hunga kaainga o te rohe ki te tuku i a ratou korero whakawaa.
No reira e meingatia ana he whakaaro hou te korero mo nga poari Maori.
E titiro whakamua ana te Poari Maori.
Kua whakaaturia tana waariu ki te rohe no reira kia uu ano ki te tika.
Koia te korero a David Taipari te tiamana o te Poari Maori o te Kaunihera o Taamaki Makaurau mo te ahua o te tuu a te poari i nga tau nei.
Ki a ia kua nohopuku te hunga amuamu inaianei aa e tupu haere ana te mana o tana roopu.
Hai taa Taipari ano e whakapau kaha ana ki te whakapai ake i nga honohononga i waenga i te mana whenua me nga roopu maataawaka o te rohe.
He tohu motuhake te korero.
Kua whiwhi tohu a Tommy Taurima toki kapa haka o te Matau a Maaui mo ana ratonga ki nga mahinga toi puuoro.
Kua taka mai i taua hoonore na te Whare Ahurea o Poroniihia i Hawaii taua tohu i hoatu ki te kaumaatua raa.
Ko Taurima tetahi o nga kaiako tautoohito i reira i te tau 63 koia hoki te kaiwhakarite puuoro mo tetahi waa roa.
Koni atu i tera he kaituhi waiata a ia, ko Te Rina me Kotiro Maori E – Ko Rongomai Wahine etahi waiata rongonui naana i tito.
Kaati ko Takapuutai Walker o Heretaunga ano tetahi o tatou kua aronuitia e te Whare Ahurea o Poroniihia mo ana ratonga ki nga mahi whakairo raakau.
Copyright © 2013, UMA Broadcasting Ltd
RELATED NEWS
