Listen Now: 
Kaua e katia nga whare kereeme
Ka haukoti i nga tono TOW mena ka kati i te whare tirotiro kereeme o te Taitokerau.
Ma te roopu reeti ngahere a te Karauna era whare e kati a te marama o Tiihema na runga i nga raruraru e paa ana ki nga tono a Te Paparahi o te Raki.
Hai taa roia Willow Jean Prime kaahore nga kaitono e maarama ana ki te huarahi hai whai atu kia kookiri pai a ratou kereeme.
Hai taana ano, kua pai te mahi a nga whare tirotiro kereeme ki te whakarite i nga roopu mo te tuu ki mua i te Taraipiunara o Waitangi.
Te reo aakonga
Kia whai reo nga tauira Maori ki runga i nga kaunihera o nga Whare Waananga katoa.
Koia te hiahia o te RTM whai muri i te mahere a te Kaawanatanga ki te whakahou i nga tikanga whakahaere o aua kura.
Ka waiho ma nga kura tuatoru raa o ratou ake Kaunihera e whiriwhiri kia tokoiti ake nga mema.
Hai taa Te Ururoa Flavell rangatira takirua o te RTM kua tupuheke te mana o nga aakonga i nga tau tata nei ahatia he mea nui kia whai waahi nga aakonga Maori ki nga whakatau mo te whakahaeretanga o nga waananga.
Kia kaha te tuu a te Piriimia
Kua tino whakaheengia a John Key mo tana whakaaetanga ki te kaupapa whakahaawea a Ahitereiria ki nga Kiwi kei Aotearoa e noho ana.
No konaa kua tuu etahi ki te whakahinga i te kaupapa e kii ana me utu taake engari e kore e whiwhi hua Kiwi maa otiraa i te waa i a tatou e noho ana i reira.
Hai taa roopu tautoko a OzKiwi he ngoikore a John Key he matapiko a Ahitereria aa kei te whati i a ratou nga motika tangata o te Kiwi.
Nga tikanga hou
Kia whai mana te Kooti Whenua Maori, te Kooti Whaanau ranei ki te whakarongo ki nga tautohetohe tanu tuupaapaku.
Koia tetahi tumanako o te Koomihana o te Ture i runga i nga rerekeetanga e whakatakotoria ana ki mua i te motu whaanui.
Hai taa te Koomihana he kaupapa tautohenga, he kaupapa tuutohu me nga korero katoa e haangai ana ki te mate.
Koni atu i tera kia whiwhi raihana nga kamupene me nga roopu katoa e whakarite tuupaapaku ai ratou.
Kaipuke kua huripoki
Kua huripoki tetahi kaipuke e hari ana i nga kaiheke o Awherika ki te Uropi kotahi rau tekau maa whaa kua mate.
E hia kee rau i whiua ki te moana paatata atu ki te aakau o Itaaria whenua.
Ko ratou etahi o te tini manomano o Awherika e haere ai ki Uropi ia tau ki reira rapu oranga ai.
Kotahi rau rima tekau maa iwa taangata i whakaorangia kiihai i taea e te nuinga te kauhoe.
He puutea mo nga kura.
Kotahi rau miriona taara ka tohaina ki nga kura e oke ana na te tini rawa o a ratou tamariki, ko nga kura i Taamaki Makaurau kei te tirohia.
E mea ana etahi kura he take hauora he take haumaru tera na te koopukupuku o te tatauranga me te iti o nga rauemi.
A tera tau ka whakatuuturuhia e ono pea nga kura hou i Taamaki.
Ki nga korero o te waa ko Taamaki te rohe kei te tupu matomato o nga rohe katoa o te motu.
Copyright © 2013, UMA Broadcasting Ltd
RELATED NEWS
