October 03, 2013
Waananga tikanga
Waananga tikanga
Kaahore e roa ka whakahou i nga anga whakahaere o nga Whare Waananga aa kua tukua e te Kaawanatanga te tuhinga tuatahi o taa ratou rautaki maatauranga mo nga tau e rima kei te haramai.
He whakarato puukenga, he whakakipakipa rangatahi, he whakapai ake te tuu a te Maori etahi o nga tuumanako maatauranga.
Koni atu i tera e hiahia ana te Minita Kura Tuatoru a Steven Joyce ki te whakaheke i te maha o nga taangata kei runga i nga poari o nga Whare Waananga kia 12 iti ake ranei.
Nga mahi ngahere
Ko wai ka mohio ki te piripono o nga kamupene nunui o taawaahi ki nga mahinga ngahere ki runga whenua Maori.
Hai taa Shane Jones maangai ngahere o te roopu Reipa kei te huri tuaraa etahi kamupene ki a tatou e kore ano ratou e whakatoo he raakau ki nga whenua Maori.
Ka mahue nga kaipupuri whenua me nga puutiotio, me nga rahurahu ranei e tupu ana.
Hai taa Jones ano kia kaha te Kaawanatanga ki te aawhina i nga mahinga ngahere kei reira kee te tini o nga rangatahi Maori e mahi ana.
He rauemi motuhake
He rauemi hou kua tuhia hai puutaketanga korero e haangai ana ki nga tikanga a nga tuupuna.
Ko Matapunenga te iingoa kei reira e whakaraarangitia ana nga huatau, nga whakamaaramatanga o nga tikanga tuku iho.
Kua whakakaupapatia nga korero e nga kairangahau o te Whare Waananga o Waikato.
Hai taa Paul Meredith o Ngati Maniapoto tetahi o aua taangata rangahau ka hoki whakamuri ki nga korero a nga rangatira o mua me a ratou korero ki nga kaituhi Paakeha no te waa i a ratou.
Hootaka whare
Ka huraina tetahi hotaka whakatuutuu whare ki te tonga o Taamaki Makaurau.
Toru rau whare ka hanga i te takiwaa o Weymouth aa ka tautokohia tera kaupapa e te Kaunihera o Taamaki Makaurau me te Kaawanatanga.
Ka whai waahi hoki etahi roopu Maori ki taua hootaka i runga i te hiahia kia kaha ake te tuuranga o nga haapori ki te whakarato whare.
Nga ratonga haapori
E tika ana kia utua ma nga Kaunihera nga ratonga haapori huri noa.
Koia te karanga o te waa me te kii he iti te paanga o nga Kaunihera ki te hootaka i o ratou rohe.
Ki etahi kua tae ki te waa ki te aata matapaki i nga whakahaere ki ro Kaunihera me te utunga o a ratou puutea.
Ko te raruraru kei te riro i te Kaawanatanga te whakahaeretanga o nga mea katoa.
Kura hourua
He maha tonu nga taangata e mautohe ana i nga kura hourua me te whakatuuwheratanga o nga kura e rima a tera tau.
Te nuinga tonu e kii ana kia tohatoha te puutea a te motu ki nga kura auraki.
Hai taa Heekia Parata Minita Maatauranga he kauapa hou nga kura hourua ma te pai raano ka puta te ihu o te kaupapa whaanui.
Copyright © 2013, UMA Broadcasting Ltd