September 23, 2013
He taura here korero ka whakatakotoria.
15 miriona taara kua whakaritea e te Kaawanatanga kia whakatakoto tetahi taura ipurangi i waenga i a Aotearoa, Ahitereiria me Amerika.
Kai te rapu tautoko te Kaawanatanga i nga kamupene e whakaarohia ana kia hanga taura pera.
Hai taa te Kaawanatanga, he taimaha te nui o nga karere ipurangi kei te piikautia e te puunaha o naianei, no reira, he mea nui tetahi taura hou kia tutuki pai nga hiahia i tenei ao hurihuri.
Nga tohu kino.
I tenei wiki ka whakatakoto nga kaipuutaiao o taawaahi i a ratou matapae, e paa ana ki te whakamahanatanga o te ao e meingatia ana he korero kino kei te haramai.
Ki etahi korero, ka kite i te maha ake o nga aawha nui, o nga waa tino maroke, o te rewa haere i te hukapapa, o te piki haere i te tai moana.
Te hanga nei kua warea te ao e te hiahia ki te mahi moni, ki te raweke i a Papatuuaanuku
kia riro ma te tangata ona hua katoa, ko te taiao te tino patunga o tera.
Kia uu ki to Maoritanga.
He nui te aroha o nga taitamariki Maori ki to ratou taha Maori te kitenga o tetahi rangahau whare waananga.
Hai taa Taakuta Melinda Webber o Te Arawa me Ngapuhi…ahakoa ka whakahaaweatia nga tauira Maori, e kaha ake ana to ratou piripono ki to ratou ahurea.
Koni atu i tera kaahore te nuinga o nga tauira Paakeha e whakaae ana ki nga mahi a o ratou tuupuna ki te whakapeehi i te Maori i roto i nga tau.
Whakamaatautauhia te mate kino.
He mea nui ki te Poari Hauora o te Matau a Maaui te tirohanga ki nga waahine, otira he whakamaatautau i te matepukupuku ahuatanga wahine e kiia nei ko cervical cancer.
Ka huri nga maatanga hauora ki te haere ki nga waahi kei reira nga waahine e mahi ana ki te aata whakamaatautau i taua maauiui kino.
Ka mutu na te nui ake o nga here o te wahine Maori ki tana whaanau ka mahue ki muri ko tona ake hauora.
Ngati Rangitihi matapaki korero.
Na runga i te whakahee o etahi o Ngati Rangitihi ki nga hui whai mana a tera marama mo nga tono TOW a te iwi ka titiro ki huarahi kee.
Hai taa Graham Pryor tiamana o te Mana o Ngati Rangitihi Trust ka hui kee a ratou ki Matataa akuanei ki te matapaki i nga tirohanga katoa ma reira ka whakarite ano he hui whai mana.
Hai taa Pryor, kua whakaaetia taa ratou rautaki whai mana e te Tari Whakataunga TOW.
Ako pakeke.
Te hanga nei ka whakatahahia nga pakeke e rapu mahi ai na runga i te tikanga hou kia aronui kee ki nga rangatahi.
Ka tapahia nga akoranga e toe ana i raro i te hootaka mo te hunga kore mahi e kiia nei
ko TOPs hai te mutunga o te tau.
Ka pupuri tonu ki etahi hootaka hai ako i te reo Paakeha atu i te tera ka whakahaere i etahi akoranga pakeke mo te tuhituhi me te paanui.
Copyright © 2013, UMA Broadcasting Ltd