January 30, 2024
Tenga Rangitauira | Ruamata | Mō tō tātou ira Māori te take
Mō te oranga o tō tātou reo Māori, mō ngā whakatupuranga e haere tonu mai ana.
Koia te take i whakaae te kaiako matua o te kapa haupoi taitama o Te Kura Kaupapa Māori o Ruamata a Tenga Rangitauira, kia hanga te ohu pāpāho a Mairanga i tētehi pakipūmeka o te kapa.
Ko ‘Ruamata: It’s More Than Hockey’ te ingoa o te pakipūmeka, ā, e aro ana ki te haerenga atu o te kapa ki te whakataetae Rankin Cup. He tuatahinga te taenga atu o tētehi kura kaupapa Māori ki te whakataetae.
Hei tā Rangitauira kei a tātou Ngāi Māori ngā kōrero ātaahua kāhore anō kia pāpāhotia.
‘I āta whakaaro au mō ngā kiriata me ngā pakipūmeka kei runga i te pouaka whakāta i hea ake rānei, kei te reo Pākeha, ka mutu nō whenua kē anō hoki. Ka āta whakaaro au mō Aotearoa nei mō tātou te iwi Māori anō hoki me te ātaahua o ngā kōrero kei roto tonu i a tātou kāhore anō kia puta ki te ao whānui. Nā reira, ko tāku, i whakaae atu ai kia tukuna tēnei kōrero hei mātakitanga mā te iwi Māori ka tahi, ka mutu hei tirohanga hoki mā ngā uri whakaheke e haere ake nei.’
A te Taite te 1 o Pepuere ka āhei te mātaki atu i te pakipūmeka reo Māori ki te paetukutuku o Te Reo Irirangi o Aotearoa.