April 26, 2023
Ko te whāinga he hākari kōrero: Rawhitiroa Bosch
He kōrero whai tikanga tō ia tangata, iti mai, rahi mai. Koia nei te whakapono o Rāwhitiroa Bosch, kaiuiui o te putanga tuarua o Ki Tua, he kaupapa reo Māori nā Whakaata Māori kātahi anō ka rewa.
He kōnae ipurangi, he whakaaturanga matihiko hoki a Ki Tua, ā, ko te aronga ā Bosch kia ruku i ngā kaupapa e ngākaunui nei ki āna tini manuwhiri, ahakoa ko wai.
Hei tāna, “Tētahi o aku whāinga, kia rongo i ngā kōrero mai i ngā tāngata rerekē, nō ngā reanga rerekē, nō ngā iwi rerekē mō ngā wheako rerekē. Ētahi he kanohi kitea e mōhio whānuitia ana i te ao Māori whānui, ētahi e mōhio whānuitia ana i roto i ō rātou ake ao, i roto ake i ō rātou ake rohe. Heoi anō ko te hiahia kia hora he hākari kōrero, he hākari wheako.”