October 27, 2014
Whenua tango poka noa.
Whenua tango poka noa.
Me whakarite rangahau kia kite te rahi o nga whenua Maori e tangohia ai i raro i te ture Public Works Act.
Koia te karanga a kaituhi Patricia Grace.
I wero a Grace i te kaawanatanga kia kore e tangohia tona whenua i Waikanae mo te hanga i te huarahi o Kaapiti.
Hai taana he aha i tango ai nga whenua Maori? na te mea kaahore pea e mahia ana? na te aha ranei?
No reira e hiahia ana te roopu Kaakaariki ki te whakatika i taua ture kia whakaruruhau i nga motika o nga kaipupuri whenua Maori.
Ebola, nga korero o te waa.
Tokotoru nga taangata kei te aata tirohia mo te paamahana o te tinana kaatahi ano ratou ka tatuu mai i te uru o Awherika ko te waahi kei reira te maauiui ebola.
E whakaaro ana te kaawanatanga me kore e aukati te kuhuna mai o te hunga o tera taha o te ao he aukatinga waa poto pea pera ano raa Ahitereiria i tenei waa.
Hai taa te Piriimia a John Key kei te whakatewhatewha haere a Aotearoa i te wherawhera o taua mate.
He pukapuka kei te taaruatia.
Te pai o nga korero hai paanuitanga ma te tangata i te pukapuka puri mahara o Taakitimu.
Kua taa tuarua taua tuhinga na Tiaki Hikawera Miitara i whakaraarangi tuatahi mai i te tau 44 o tera rautau.
Hai taa Taakuta Pita Sharples ka whakaatu te pukapuka i tetahi ahua o te iwi whaanui o Ngati Kahungunu engari ka kite i etahi hononga a tangata, a rohe.
Kaati ka tohaina nga hua o te pukapuka ki te whakarite karahipi mo nga aakonga o te Kaareti o Te Wairoa.
Kei te haere tonu nga hui.
Ka tae atu te hui mo te rangatiratanga o te roopu Reipa ki Whakatuu a te po nei.
Ka tuu nga kaiwhakataetae e whaa a Nanaia Mahuta maa ki te whakatakoto i a ratou korero ki nga waahanga e toru o te paati ka korero, ka whakautu paatai te tokowhaa raa.
Ka karangahia te otinga o te pooti hai whakatuu rangatira a tera marama.
Heoi ano kei te whai te roopu Reipa o Aotearoa i nga tikanga a etahi atu kaahui Reipa o taawaahi araa kia whai waahi nga mema o te paati ki te pooti mo to ratou rangatira hou.
He wero ki nga kaiwhakahaere.
Kei hea te piripono o Reo Taataki ki nga kaupapa whaanui e paa ana ki te Maori?
Koia te paatai a Nga Aho Whakaari ki te whakatau kia tukua te nuinga o nga hootaka Maori ki waho ma roopu kee e hanga, e whakahaere.
Hai taa Lanita Ririnui Ryan mema poari o Nga Aho Whakaari ahakoa nga painga o taa Te Reo Taataki i whakatau ai mo nga kamupene hanga hootaka kiihai i whakarite hui ki te korero i te kaupapa.
He rapunga huarahi mo te iwi kainga.
Me whakarite kaupapa te Kaunihera o Taamaki Makaurau ki te tautoko i tetahi rautaki tiaki tuuruhi engari kaua e mahue ko te mana whenua.
Kua hui nga maangai a iwi ki te koromatua ki a Len Brown ki te matapaki i nga kaupapa puutea hai taana kua maarama ki nga iwi te taimaha o nga take puutea e piikautia ana e te kaunihera aa kei te kite hoki i te aro o nga tuuruhi ki te ahurea o te Maori.
Kaati horekau he kii taurangi a Brown i tenei waa mo te rahi o te tautoko a puutea ka taea e te kaunihera te homai ki te mana whenua mo te manaaki tuuruhi, mo te aha ranei.
Copyright © 2014, UMA Broadcasting Ltd: www.waateanews.com